MALISOD nga dalan maoy sagubangon ni Kai Sotto ug kaubanan sa ilang tahas sa 2019 Fiba Under-19 Basketball World Cup didto sa Heraklion, Greece karong Hunyo.
Kini human nga Pilipinas nahitapo sa Group C nga gilangkuban sa host Greece, Argentina ug Russia sa torneyo nga gisalmutan sa 16 ka teams ug sugdan sa Hunyo 29 ngadto sa Hulyo 7,
Si Sotto, ang 17 anyos kinsa ning bag-ohay lang gipasidunggan isip most valuable player sa UAAP Season 81 sa juniors division, maoy mangulo sa RP squad nga gilangkuban usab sa Fil-Brit slotman AJ Edu, Rome-based playmaker nga si Dalph Panopio, ug ang forward sa National University nga si Dave Ildefonso.
Ang Batang Gilas nakakuha og luna sa maong kompetisyon human kini ma-fourth sa 2018 Fiba Under-18 Asian Championship sa Thailand sa niaging tuig.
Apan taliwala ning maong kalambuan, mitumaw ang gamayng problema sa team sanglit hangtod karon wa pay pinal nga desisyon kon kinsay magsilbing headcoach sa team nga mopuli ni Josh Reyes.
Si Andrew Teh, ang team manager sa Gilas, nagdumili sa paghatag og pamahayag kalabot niini.
Gihugonhugonan karon nga si Ateneo headcoach ug kanhi Gilas coach Tab Baldwin mao nay modala sa programa alang sa national youth. (JBM)