MATANOG, Maguindanao Province -- Nipasalig ang pamunoan sa 37th Infantry Battalion, Philippine Army nga motabang sa pamilya sa namatay ug naangol sa aksidente sa kadalanan kon diin ang ilang military truck ang nalambigit.
Sa maong hitabo, duha ka tawo ang namatay samtang laing duha sab ang naangol sa dihang gisungag sa military truck ang tulo ka motorsiklo ala 1:15 sa hapon niadtong Miyerkules, Pebrero 21.
Giila ang namatay nga sila Mohammad Mastura ug Candao Usango samtang ang duha nga naangol ila ra sab nga mga kaubanan.
Gibutyag ni Maguindanao Police Provincial Office director, Senior Superintendent Ronald Briones nga sakay ang mga biktima sa tulo ka motorsiklo didto sa Barangay Sarmiento, Matanog.
Apan kalit lang nag-overshoot ang kasugat nila nga KM450 nga military truck sa 37th IB sa dihang nawad-an matud pa og preno.
Wala na makontrola sa drayber nga sundalo ang trak ug gisungag ang tulo ka motor nga kasugat niini.
Daling gitabang sa mga sundalo ang mga biktima ug gihatud ngadto sa Parang District Hospital apan sila si Mastura ug Usango hikabsan sa kinabuhi human makaangkon og daghang mga bali ug pangos sa kalawasan. (Edgar E. Fuerzas)