19-anyos babaye gipusil sa ulo

DIGOS CITY -- Talandugon ang kahimtang sa usa ka 19-anyos nga babaye human gipusil sa wa mailhing suspek tumong sa ulo, ala 1:45 sa kaadlawon, Huwebes, Pebrero 21.

Sumala ni Superintendent Deozar Almasa, city police director, nga ang biktima si Berna Jane Obiena Dillo, molupyo sa Purok Tangigue, Barangay Dawis.

Sa inisyal nga imbestigasyon sa kapulisan, gihulagway nga pauli na ang biktima nga nagmaneho sa iyang kolor yellow ug itom nga Yamaha motorsiklo.

Gikan matud pa ang biktima sa videoke bar sa iyang inahan sa Barangay San Jose dihang pag-abot tungod sa gate sa ilang balay, milanog na ang kusog nga buto sa armas.

Nahagba ang biktima sa yuta mao nga daling gitabang sa iyang pamilya ug gihatud ngadto sa Davao Sur Provicial Hospital diin anaa sa talandugong kahimtang.

Wa na maabti sa mirespondeng kapulisan ang suspek human nakasibat padung sa wa matinong direksiyon apan gipailawom na sa manhunt operation.

Di pa masulti ni Almasa ang motibo sa krimen samtang padayon ang lawom nga imbestigasyon. (Orlando B. Dinoy)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph