ANG mga nahitabong sagunsong sunog sa dakbayan sa Davao nga nagsugod Miyerkules sa hapon hangtud Huwebes sa buntag Pebrero 21, nikalas og usa ka kinabuhi ug pagka-abo sa daghang mga kabalayan ug pagkadislokar sa daghang mga pamilya, ilabi na mga kaigsuonan natong mga Badjao.
Inay nga molibot sa kadalanan sa dakbayan aron nga mamaligya sa ilang mga Ukay-ukay nga sapatos ug sinina, si Hayno Sakalain, usa ka Badjao, natanggong na hinuon sa evacuation center sa Miniforest, Boulevard, dakbayan sa Davao human nga ang ilang balay gilamoy sa dakong kalayo nga naglakip sa ilang mga produkto.
Naa sila sa sulod sa ilang balay, nagpahulay, sa dihang nakabati og siyagit nga dunay sunog sa ilang lugar. Nakahimo pa sila sa pagsalbar sa pipila nila ka butang tungod niadtong higayona, ang kalayo layo pa sa ilang mga balay apan human pipila ka minuto, ang sunog dali rang mikanit sa mga silingan sa daplin sa baybayon ug gilamoy ang kapin 200 ka mga balay.
Ang sunog wala lang milamoy sa ilang mga balay apan lakip na sab sa ilang mga makina sa panahi ug ilang mga bangka nga gipanag-iya sa ilang mga amahan ug gigamit sa iyang igsuong lalaki sa pagpangisda isip usa sa ilang panginabuhian.
Ang evacuation area napuno sa mga nawad-an og balay sa sunod ug nahimo sab nga duwaanan alang sa mga kabataan, nga wala masayud sa nahitabong katalagman.
Sukad alas 2 sa hapon niadtong Huwebes, ang Davao City Social Services and Development Office (CSSDO) nakatala na og 288 ka mga tag-iya og balay, 374 niambit, 65 nangabang, 31 boarder alang sa kinatibuk-ang 703 pamilya nga nawad-an og mga balay.
Usa ka suliran nga ilang giatubang karon mao ang sanitasyon ug kakuwang sa kasilyas aron nga makaligo, ug makalabay sa ilang hugaw.
“Wala pa mi kaligo kay wala pay tubig. Usahay gani kung mangihi mi, manguha mi og balde para sudlanan unya ilabay sa kanal,” matud pa niya. Iya sab nga giangkon nga dunay sama niyang katribu kinsa way ug mahingi lang bisan asa.
Kini ang unang higayon nga nadislokar sila tungod sa sunog. Nakahinumdom siya niadtong 2014, ang ilang balay nasunog sab ug nagsugod na sab og balik gikan sa wala.
Sa uwahing impormasyon sa Bureau of Fire Protection (BFP), ang hinungdan sa sunog mao ang electrical nga nagsugod lang sa kisame nga bahin sa balay sa usa ka Fernando Anton.
Ang lokal nga kagamhanan nagtunol na og tabang sa mga biktima. Gihatagan sila og habol, banit, ug mga moskitero apil na mga pagkaon. Ug makadawat sab sila og tabang pinansiyal.
Sa pikas bahin human ang dakong sunog sa Barangay 23-C, lain na sab nga sunog ang niulbo sa Purok 13, Kasilak, Barangay 76-A, Bucana, Davao City.
Gitaho kini ngadto sa mga bombero alas 7:50 sa gabii niadtong Pebrero 20 nga naglambigit og mga kabalayan.
Base sa taho, nagsugod ang kalayo sa balay nga gipanag-iya ni Rhodora T Elladora ug nakaabot sa ikatulong alarma.
Gideklara ang sunog nga pawong na alas 10 sa gabii, nidanyos og gibana-bana nga P700,000 kantidad sa propedad.
Kinatibuk-ang unom ka mga balay gilamoy sa kalayo samtang laing duha ang parsiyal lang ang damyos sa sunog kon diin wala pa masayri ang hinungdan niini.
Samtang Huwebes, ang dakbayan sa Davao, Lanang Fire Station, Region 11 nagtaho nga dunay sunog nga nahitabo sa Toyota St., Barangay Centro Agdao, Davao City Huwebes sa buntag, Pebrero 21.
Ang gigikanan sa sunog mao ang bungbong nga bahin sa stock room owner nga usa ka Antonio Bioco, 59, ug Armida A. Bioco, 51.
Apan ang insidente nakakalas og usa ka kinabuhi nga giila nga si Adela Abad, 61, igsuon ni Armida A. Bioco.
Dunay gibanabana nga damyos nga P200,000 kon diin usa ka balay ang nahurot og kasunog samtang duha ang parsiyal lang samtang wala pa masayri ang hinungdan sa sunog.