MOABOT sa P2 milyunes nga balor sa drugas ang nasakmit sa kapulisan ug 10 ka mga tawo napusasan Huwebes sa kaadlawon sa Brgy Cansojong ug Brgy San Isidro, dakbayan sa Talisay.
Ang joint operation gipanguluhan ni Sr. Insp. Alejandro Batobalonos, hepe sa Provincial Drugs Enforcement Unit (PDEU ) sa Cebu Provincial Police Office CPPO ug Provincial Intelligence Branch (PIB-CPPO).
Unang operasyon mga alas 12:10 sa kadlawon sa Sitio Manggahan Brgy. Cansojong, nasikop ang upat ka gikatahapang drug pushers.
Si Marc Tapis,35, minyo, subject sa buy bust nasikop lakip sa napusasahan ang mga kakunsabo nga sila si Jerry Apura, 33, nagpuyo sa nahisgutang lugar; Rene Cañete, 44; ug Rosella Palma,27.
Matod pa ni Batobalonos nga big time ang grupo ni Tapis.
Ila kining gipalitan og usa ka bulto balor og P16,000.
Nakuhaan nila kini og lima ka dagkong putos, tulo ka medium nga putos ug 41 ka gagmay nga nga putos sa gituohang shabu ug P10,000 nga halin.
Si Batobalonos nagkanayon nga ang drugas motimbang og 264.73 gramos nga mobalor og P1,793,364.
Pagka-alas 3:40 sa kadlawon, laing buy bust operasyon ang gipahigayon ni Batobalonos sa Ramona street sa Brgy San Isidro.
Nasikop sila si Amalia Gonzales, 38, dalaga; mga kakonsabo nga sila si Romel Taburada, 27; Celestina Gonzales,28; John Eric Tapiones, 23; Melvin Solon, 27; ug Rod Jay Cavalida,18.
Matod ni Batobalonos nga nasakmit nila sa mga dinakpan ang 25.92 gramos sa shabu ug P15,000 nga buy bust money ug gituohang halin nga P1400. Ang drugas mobalor og P176,256.
CEBU CITY
Tulo ka gikatahapang mga durugista nasikop sa managlahing mga buy bust operation sa kapolisan sa Mambaling police station sa Cebu City Police Office (CCPO).
Sa buy bust sa sitio Ibabao, Brgy. Mambaling niadtong Pebrero 21 pasado alas 2 sa kadlawon nga gipangulahan ni Sr. Inspector Francis Renz Liquigan Talosig, nasikop sila si Jay Cyrus Calunag, 30, ug John Lerie Lopez, 19.
Ang duha lumad sa mao nga barangay.
Sa ilang pag abot sa maong lugar, gisuwayan sa pagpalit sa pulis nga poseur buyer si Calunag og drogas ug nagpositibo hinungdan nga gidakop sa kapulisan.
Nakuhaan si Calunag og pito ka mga gagmay’ng pakite sa gituohang shabu ug lain ka tulo ka medium size sa mga pakite sa shabu ug buybust money nga P200.
Samtang nasikop usab si Lopez human nga makit-i ni Montellano nga adunay drugas.
Ang tanan mokabat og 15.6 grams nga dunay balor nga 106,080.
Samtang sa laing bahin, niadtong Pebrero 20, nasikop sa Sitio Bernardino brgy. Mambaling sa alas 6:30 sa gabii si Jimuel Acacio, alyas Insik, 22.
Sa maong adlaw nag-roving ang kapulisan kay aduna silay nadawat nga impormasyon kay sagad adunay mga drugs transaction sa maong dapit.
Ilang naaktuhan si Acacio nga namaligya.
Si Acacio nakuhaan og 10 small sachet sa gituohang shabu nga motimbang og 5.6 grams ug mobalor og P38,080.
Ang tulo pulos bag-ong drug player.