NAKADAWAT og cash incentive gikan sa kagamhanan sa dabayan sa Lapu-Lapu ang moabot sa 97 ka mga board passer sa uwahing bahin sa tuig 2018 nga mga nanimuyo sa dakbayan.
Ang maong pagpang apud-apod sa kagamhanan mao nay ika-9 nga hugna sukad gisugdan ang panghatag sa dakbayan sa mga board passer niadtong tuig 2017.
Nikabat og P5 mil ang gihatag nga pahalipay ni Lapu-Lapu City Mayor Paz Radaza ngadto kanila ug personal kini nilang gidawat sa buhatan sa mayor niadtong Martes Pebrero 19.
Katuyoan sa paghatag sa cash incentive mao ang paghatag og pahalipay sa mga Oponganon nga nagpakita sa ilang kakugi ug kahago sa pagtuon hilabi na nga alang sa mayor dili sayon ang pagpasar ug usa ka board exam.
Nanghinaot ang mayor nga magamit sa mga bag-ong professional ang ilang nagkadaiyang propisyon.
Sa 97 ka mga board passer, 67 niini mga magtutudlo, 8 Marine Engineers, 4 Criminology, 2 Nurses ug 2 Pharmacists.
Samtang, tagsa usab ka Electronic Technician, Registered Electrical Engineer, Physical Therapist, Interior Designer, Certified Public Accountant ug Civil Engineer ang nakadawat.
Sa kinatibuk-an moabot na sa kapin usa ka libo ka board passers ang nahatagan ug cash incentive sa dakbayan.
Ang dakbayan una nang mipasar ug ordinansa pipila ka tuig ang nakalabay sa paghatag og cash incentive sa mga Oponganong board passer gikan sa P100,000 ngadto sa P5,000.
Ang kantidad nga madawat magdepende kung usa lang ka passer o mas ak kon topnotcher ang usa ka board examinee. (GCM)