PIPILA sa mga nasikop sa tinugyanan sa kapulisan sa Police Station 9 (PS9) sa Macasandig gikan na nabilanggo ug nakagawas tungod sa “plea bargaining” ang giingong nibalik sa ilegal nga kalihokan.
Sa pakighinabi sa SunStar SuperBalita sa bag-ong hepe nga si Police Senior Inspector Teodoro De Oro nga padayon sila nga nag-monitor sa mga nitahan na ug sa mga nakagawas tungod sa plea bargaining.
“Ang uban gikan sila nag plea bargaining nadakpan pag usab kay nibalik napud sa ilang activities, gamay nalang na sila kay sa bag-o ato na nga gi-update atong drug watchlist naay mga plea bargaining ug surenderer atong gina-monitor,” matud ni De Oro.
Hugot usab ang koordinasiyon niini sa komunidad sama sa mga habal-habal, motorela, ug sikad drayber ug matag bulan duna’y panagtagbo aron na usab nga magpadayon ang maayong relasyon.
Kanunay usab nilang giaghat nga motaho gyud dayon sila kung adunay mga mamatikdan diha sa mga kadalanan kung duna’y mga panghitabo.
Nasayran nga sukad sa bulan sa Disyembre 5 2018 paingon sa Pebrero 11,2019 anaa sa 49 ka mga operasyon ang napahigayon niini kalabot sa ilegal nga druga ug 65 ang naaresto samtang 2 usab ang napatay sa operasiyon.