GIHINGUSGAN karon sa tinugyanan sa kapulisan sa Police Station 9 (PS) sa Macasandig ang pagbaton og “milk bank” ilabi na sa hugot nga kampanya ug adbokasiya sa pagtabang sa mga bag-ong himugso nga mga bata nga nagkinahangkan og gatas.
Nasayran nga si Police Officer 1 Llena Sol Josefa Mainar sa PS9 ang nag-viral sa social media human nga nagdonar sa iyang gatas sa bag-ong himugso nga bata diin gani gipailalom sa operasiyon ug ang inahan niini naglisod sa pagbaton sa iyang gatas hinungdan nga nangayo kini og tabang pinaagi sa pag-post usab sa social media.
Usa sa mga inahan ang nitubag sa pagpangayo niini og tabang ug mao kini si Mainar diin karon padayon ang pagtabang sa mga nanginahanglan nga mga bata.
Sa pakighinabi sa SunStar Superbalita, iyang gibutyag nga padayon kini sa paghatag sa iyang gatas apan lage kay walo ka bulan na ang anak hinungdan nga dili na matud nutritious kaayo.
Nanawagan kini sa mga mommies nga modonar sa ilang mga gatas ilabi na kung kini nanghinobra.
“Labi na mga bago nga mommies nga magpa-breastfeed dili lang na ingon nga nutritious sa imoha, nutritious nga food para sa imong baby kundi daghan pud bata nga atong matagaan og pagkaon,” pag-aghat ni Mainar.
Gidugang usab niini nga sila ang magtigom sa mga gatas aron nga makatabang ug sila sab ag mohatod niini sa mga ospital.
“Kami ang maglikom og milk para among ihatag sa mga bata especially tong bata nga need gyud niya which is ang milk namo, like naa’y mamatay nga mama kailangan niya mabuhi with the help sa among milk tagaan namo siya,” dugang niini.
Plano usab niini nga magpahigayon og gitawag nga milk letting aron nga duna usab sila’y mga mapundo nga mga gatas ug makahatag sa mga nagkinahanglan niini.
“Mao na among plano maghimo mi og milk letting sa atong naandan is bloodletting naa ra sa usa ka lugar then ang mother maoy moadto didto then naay na-assign nga doctor nga mo check,” dugang niini.
Dili usab angayang mabalaka ang mga inahan sa gatas nga e-donar sa kapulisan gumikan na usab kay nakig-koordinar man usab kini sa mga health center ug doktor aron masiguro nga luwas ang gatas.
Sa pagkakaron, gamay pa ang pundo nila nga gatas sa ilang storage hinungdan nga nag-aghat sa mga inahan nga mohatag sa ilang mga sobrang gatas.