NASAPON nga nag-inom og ilimnong makahubog ang 12 ka mga estudyante nga pulos mga menor de edad atol sa inspeksiyon sa tinugyanan sa Regulatory and Complaint Board (RCB) niadtong Pebrero 19, sa Barangay 27, dakbayan sa Cagayan de Oro.
Nagpahigayon ang tinugyanan sa RCB ug City Social Welfare and Development (CSWD) og inspeksiyon ug monitoring ilabi na sa nadawatang mga taho gikan sa nagpakabanang mga katawhan.
Sa pakighinabi sa SunStar Superbalita ngadto na sa secretary ug inspectorate team leader sa RCB nga si Antonio Resma Jr., nasapon gyud nga nag-inom og hard liquor ang mga menor de edad.
“Kamulo gyud sila og inom magbarkada mag classmate man siguro to, murag lain-lain nga eskwelahan, 12 sila ka minors didto, so naay uban nag-uniform man. Dakong posibilidad nga nag-cutting classes,” matud ni Resma.
Gidugang pa usab niini nga gawas nga gibadlong ang maong patigayon, gi-isyuhan kini og notice of violation ilabi na nga nagbaligya kini og ilimnong makahubog sa mga menor de edad ug nagpa-inom
“Amo nang gibadlong, kani nga set-up di gyud mahimo, naa sa dalan nag inom labaw na gyud mga estudyante nag-inom,” dugang niini.
Gisuta pa usab ang gakadawatang taho nga posibleng duna’y mga gakahitabong dili maayo ilabi na sa child trafficking ug prostitution.
“Isa na sa gina-evaluate gali nato kay katong naay gamay nga kwarto isa pud sa ginapa rentahan lugar dayon, so naay posibilidad nga naay gakahitabo nga paghilawas kay mao lage nag-inom sila unya kung mahubog siguro, chek-in lang lugar daw didto,” dugang niini.
Padayon ang hugot nga kampanya sa tinugyanan sa RCB aron nga magpabilin matud nga child friendly city ang dakbayan.