Rivers for Life gilusad

River clean-up. (Fe Marie Dumaboc)
River clean-up. (Fe Marie Dumaboc)

PORMAL nga gilusad diha sa viewing deck sa Butuanon River sa Dakbayan sa Mandaue ang dungan nga pagpanglimpyo sa 10 priority river sa tibuok Central Visayas Byernes, alas 6:30 sa buntag, Pebrero 22.

Pinanguluhan sa Department of Environment and Natural Resources (DENR) Director Gilbert Gonzales, nihimo og kapin sa usa ka oras nga pagpanglimpyo diha sa pipila ka parte sa sapa sa Butuanon.

Kuyog ang dul-an sa 300 ka mga niboluntaryo nga mohimo og pagpanglimpyo, gikan sa mga pulis, sundalo, mga tinun-an, nagkadaiya nga ahensya sa gobyerno, sakop sa clean and green ug mga kawani sa pipila ka mga pribado nga kompanya.

Gitug-an ni Gonzales nga ang programa usa sa mga paagi agi og tubag sa hagit ni Environment Secretary Roy Cimatu atol sa gipahigayon nga International River Summit nga gihimo sa Sugbo niadtong Nobyembre sa niagi nga tuig, alang sa pagpabalik sa kalimpyo sa kasapaan sa tibuok nasud.

Atol sa 4th IRS, ang Butuanon River ang nahimo usab nga model river gikan sa kanhi gihulagway nga susama'g patay na nga sapa ngadto na sa hinay-hinay nga kalimpyo niini, hinungdan nga diha gihimo ang paglusad sa programa nga Rivers for Life.

Anaa usab si Department of Tourism (DOT)-Central Visayas Director Shalimar Tamano, kinsa nitug-an nga ang pagpanglimpyo sa kalikupan ang nag-una usab nila nga kawsa isip kabahin sa ilang sustainable tourism.

Gawas sa Butuanon river, laing duha dinhi sa Sugbo ang sapa sa Bulacao sa dakabyan sa Sugbo ug ang sapa sa Luyang, lungsod sa Carmen sa amihanan nga bahin sa probinsya sa Sugbo, ang nalakip sa 10 priority river, ug ang uban ang anaa sa lalawigan sa Bohol, Siquijor ug Negros, kinsa nihimo usab sa ilang subsob nga pagpanglimpyo.

Gipasabot ni Gonzales nga ang napulo ang lakip sa na-classify nila sa Class C river kon sapa nga nakit-an nila nga mahimo pa nga makapangisdaan.

Samtang ang Class B river mao ang mga sapa nga mahimo nga kaliguan ug ang Class A mao ang tubig sapa ang mahimo pa nga mainum, kinahanglan lang ang treatment.

Matud ni Gonzales nga ang Central Visayas ang adunay di mominus 500 ka mga sapa.

"This in response to Environment Secretary Cimatu's pronouncement during the International River Summit, for the DENR to take the lead, spearhead the cleaning of rivers in the country. To raise awareness on the need to protect and conserve the country’s rivers as the lifeblood of the Earth and human civilization. To tap concerted action to protect the country’s rivers from degradation and pollution and assure their suitability, sustainability and further improvement for their designated use or classifcation and others," asoy ni Gonzales.

Matag bulan, mohimo sila og mga dinagko nga pagpanglimpyo ug nipatabang usab sila sa mga lokal nga kagamhanan alang sa himuon nga matag adlaw nga pagpanglimpyo.

Sama nalang sa Barangay Ibabo Estancia sa dakbayan sa Mandaue, si Kapitan Romulo Echavez Jr., kinsa anaa atol sa paglusad, nitug-an nga gawas sa eco enforcer gikan sa Mandaue City Environment and Natural Resources Office, aduna gyud silay gitagana nga upat ka mga sakop sa clean and green nga magpuli-puli sa pagbantay ug panglimpyo sa parte sa sapa sa Butuanon diha sa ilang barangay.

Gitug-an usab ni Gonzales nga mo-deputize sila og 500 ka mga sakop sa clean and green o mga sakop diha sa barangay nga mahimo nga maka-issue og citation sa kon si kinsa nga indibidwal ug kompanya nga masakpan nga magpataka og labaw sa ilang hugaw o basura sa kasapaan.

Moabot sa duha ngadto sa tulo ka kilometro ang gilay-on sa sapa nga gilimpyuhan diha sa Butuanon river Byernes sa Buntag, nga nahimutang sa mga barangay sa Ibabao Estancia, Alang-alang, Paknaan ug Umapad.

Usa sa mga nibulontaryo sa pagpanglimpyo ang mga tinun-an sa Opao Elementary School.

Ang mga 11-anyos ug 12-anyos nga sila David Rondina ug Mechaella Abatayo ang nitug-an nga angay lang sila manginlaboy ug uban pa nga mga bata sa pag-amping sa kasapaan aron dili kini mahimo unya nga tinubdan sa posibleng katalagman nga moigo.

"Alang sa ubang mga bata, kon dili man ta makatabang sa paglimpyo sa sapa, mas maayo nga motabang ta nga dili maka-contribute sa basura, so dili magpataka og labaybsa basura, aron walay moigo nato nga disaster," awhag ni Abatayo.

Ug mao usab kini ang pipila sa gitinguha sa programa karon sa DENR, ang oagkab-ot og mha sakto nga mitigation measures ug inyervention aron pagtabang ilabi na niadtong nagpadayon nga nadaot nga kondisyon sa river system sa bisan asa sa nasud.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph