3 ka sunog sa Eastern Visayas nagbilin og P4.5M nga danyos

LEYTE -- Tulo ka managlahi nga sunog sa Eastern Visayas ang girespondihan sa mga bombero Huwebes, Pebrero 21.

Moabot sa P4.5 million ang danyos sa maong mga sunog.

Alas 7:15 Huwebes sa gabii, Pebrero 21, kapin kun kulang 50 ka panimalay ang naugdaw sa Barangay Narra, Catarman sa Northern Samar.

Nasayran nga nag-sugod ang kayo sa panimalay sa usa ka Lucy Pabia.

Gitumbok nga hinungdan ang faulty electrical wiring nga nagpasilaob sa panimalay.

Gumikan kay ginama sa light materials ug semi-concrete ang kabalayan, dali ra nga mikatap ang kayo.

Wa dayun mapugngi ang kayo, hinungdan sa pagkatap sa ubang panimalay.

Gibana-bana nga mokabat sa P1 milyon ang danyos sa maong sunog.

Hingpit napawong ang kayo alas 9:43 sa gabie. Walay angol ug nakalas.

Sa 8:15 sa gabie, naalarma ang mga bombero sa Abuyog, Leyte human usa ka 10-wheeler truck ang misilaob sa Barangay Tadoc.

Ang maong trak gimaneho sa usa ka Warren Maglasang, taga Barangay Buhangin, Davao City, ug dunay upat ka sakay.

Ang maong trak dunay kargang construction supplies gikan sa Davao paingon sa Tacloban.

Ang drayber nakabantay nga dunay miaso sa makina busa gisusi kini apan kalit miulbo ang kayo apan dali sila nakadagan palayo.

Gideklara nga fire out ang sunog alas 8:55 sa gabii. Walay nakalas ug naangol. P2.5 M ang danyos sa maong sunog.

Samtang alas 9:42 sa gabie, naalarma ang kabomberohan sa Tacloban City sa nadawat nga tawag.

Ang UMart Building sa dan M.H Del Pilar ang nasunog.

Nagsugod ang kayo sa second floor sa maong edipisyo nga giabangan sa usa ka James Sy ug gipanag-iya ni Leonico Yu.

Nakabantay ang tag-iya nga niaso na ang ikaduhang andana busa nanawag kini sa kambomberohan.

Niresponde ang mga bombero sa Tacloban Fire Station ug Delta Chinese Fire Volunteers.

Gideklara nga fire out ang sunog alas 11:20 sa gabie. Walay naangol ug nakalas.

Nagbilin og P1M nga danyos ang sunog.