KARON nga gideklarar na sa Philippine Atmospheric, Geophysical and Astronomical Services Administration (Pagasa) ang weak El Niño, gilauman nga makasinati pa og pagnihit sa uwan ug grabeng init ang nasod ug ang Sugbo.
Pebrero 21, Huwebes, dihang gideklarar sa maong ahensiya ang El Niño.
Matod ni Engr. Al Quiblat, ang officer-in- charge (OIC) sa Pagasa Visayas, nga moabot sa dry spell ang masinati sa Sugbo sa umaabot nga Mayo.
Sugod karong Pebrero, ubos sa normal na nga uwan ang masinati gikan sa 20 ngadto sa 60 porsyento nga ubos sa normal.
Dugang ni Quiblat nga dili mokompiyansa ang publiko, mag-uuma, ug water suppliers tungod kay aduna’y tyansa nga mo-moderate ang karong nasinati nga weak El Niño.
Dugang usa ka degree celcius usab ang masinati karong summer gikan sa naandan nga 26-33 degree celcius.
Ug possible nga moabot sa 40 degree celcius ang heat index o ang kainit nga masinati sa umaabot nga buwan.
Hinuon, tungod kay usa kini ka weak El Niño, sa pagkakaron, mubo ra kini itandi sa mga nangagi nga niabot og walo ka buwan.
Gilauman nga mobalik na sa normal ang pag- uwan sa Hunyo.