DEAR Noy Tikyo,
Maayong adlaw. Duna koy duha ka problema. Una, ang akong pamilya. Di man god nila madawat ang akong boyfriend nga 25 anyos kay dunay anak.
Nakapamabdos siya og babaye kaniadto apan wala sila magdayon, busa naa sa iyang ginikanan ang bata.
Ang akong ginikanan nagduda nga mao nga wa magkadayon ang akong boyfriend sa babaye kay iresponsable siya. Busa di sila gusto nga kami ang magkauyab kay basin og pamabdosan ra sab ko niya ug biyaan.
Ikaduha nakong problema bahin mismo sa akong boyfriend. Init siya og ulo kanunay di makasabot sa sitwasiyon. Di man god ko kanunay nga makigkita niya kay supak lagi ang akong ginikanan. Makigkita ra ko niya kon importante na gyud. Pero masuko man siya.
Karon nagduda siya nga duna koy lain kay nganong di ko mopakita niya. Nibahad pa gyud siya nako. Unsaon man nako ni siya pagpasabot?
Mina
*****
Mina,
Ayaw na og hasola ang imong hunahuna kon di siya maminaw sa imong eksplinasyon. Kay bisan pa og unsaon nimo og pangulipas nga wa kay lain, di man gyud siya motuo.
Kon tan-aw nimong unreasonable na siya kay nagduda, mas nindot nga undangon na ninyo ang inyong relasyon.
Lisud man nang mobahad siya nimo kay uyab pa gani mo, unsa na kaha kon minyo na. Kon di mo magkasinabot karon, dako ang posibilidad nga di sab mo magkasinabot kon minyo na.
Busa di ikatingala nga di madawat sa imong ginikanan ang imong boyfriend karon. Makita ug mabati kini sa imong ginikanan bisan og wala diha ang imong boyfriend.
Ang ako lang nimo, ayaw og pagdali-dali sa imong desisyon. Mas nindot nga maminaw ka sab sa mga tambag sa imong ginikanan kay alang man sab kini sa imong kaayohan.
Noy Tikyo