DI NA ikatingala nga bisan pa sa higpit nga kampanya sa gobyerno nga puohon ang Communist Party of the Philippines-New People's Army (CPP-NPA) sa nasud, pabilin gihapong dakong buhi ang kalihukan tungod sa nakuhang suporta sa katilingban.
Duna man tuoy daghan nang nanurender nga mga giingong mass supporter sa walhong kalihukan, apil na ang uban pang mga regular nilang mga manggugubat, apan mora og wala man lang matandog ang hut-ong sa mga rebelde.
Diay nasayran nga dunay 349 ka mga opisyal sa local government units ang nisuporta sa kalihukan.
Kini mismo ang gibutyag ni Interior Sec. Eduardo Año nga ang mga nahisgutan nihatag og suporta o nagbayad og mga campaign fees ug extortion money sa CPP-NPA.
Sa nahisgutang ihap, matud pa, 11 mga provincial governors; lima mga bise gobernador; 10 mga provincial board members; 55 mayores; 21 bise mayores; ug 41 ka mga konsehal.
Apil sab sa listahan ang 126 ka barangay kapitan; 50 ka kagawad; ug walo pa ka mga barangay opisyal.
Giingon nga ang nanghatag og extortion money mao ang 11 ka kanhi mga opisyal sa local government units (LGUs), 10 ka incumbent nga kongresista, ug usa ka kanhi kongresista.
Sukad niadtong 2016 ug 2018 elections nakatigum og pundo ang CPP-NPA nga naa sa kapin P195.5-milyon.
Ang pinakadaghan nga mga opisyal nga namonitor nga nihatag og tabang pinansiyal sa CPP-NPA nagagikan sa Regions 10, 4, 11, 2 ug 8.
Apan ang atong gikahibudngan nga kon natumbok na sa gobyerno kining mga opisyal nga nagtabang sa CPP-NPA, nganong wala may gihimong aksiyon batok kanila.
Nagpasabot nga namihasa ang mga nahisgutan kay wala man gukda sa kagamhanan.
Lisud kaayo palandungon nga kon ang yano lang nga mga kabus ang mosuporta ngadto sa kalihukan, dali ra kaayong dakpon ug ikarsel sa mga awtoridad.
Apan kon mga dagko nang tawo, sama sa mga nahisgutang mga politiko, way mahimo ang gobyerno?