DIGOS CITY -- Usa ka retiradong sakop sa Philippine Army (PA) ang nasikop sa hiniusang operasyon sa Provincial Intelligence Branch, 1st Davao del Sur Provincial Mobile Force Company (DSPMFC) ug Digos City Police Office (DCPO) subay sa orden de aresto gikan sa Regional Trial Court (RTC), ala 1:40 sa hapon, Huwebes.
Ang suspek nailhang si Ponciano Ebia Andal, 58, nga taga San Antonio Village, Purok Narra, Barangay Zone II.
Si Superintendent Deozar Almasa, city police director, nagbutyag nga ang suspek gikasohan og paglapas sa Seksyon 6 sa Presidential Decree 1619 nga “Penalizing the use or possession or the authorized sale to minors of volatile substances for the purpose of inducing intoxication or in any manner changing, distorting or disturbing the auditory, visual or mental process.”
Ang warrant of arrest gilagdaan ni RTC Branch 18 Presiding Judge Marivic Trabajo-Daray niadtong Enero 25, 2018.
Dugang ni Almasa nga ang akusado anaa na sa ilang kustodiya apan ang korte nagtakda og piyansa kantidad og P24,000 alang sa temporaryong kagawasan niini.
Tungod niini, subling gipahinumdoman sa mga awtoridad ang mga negusyante nga likayan ang pagbaligya og ilimnong makahubog ug sigarilyo ngadto sa mga menor aron di makasohan ugaling madakpan. (Orlando B. Dinoy)