MIDSAYAP, North Cotabato -- Padayon pa karong nangalap og mga ebidensiya ang mga awtoridad aron nga sayron kon unsa gyud ang tinuod nga motibo sa pag-atake sa mga nagpulong mga opisyal sa Barangay Nes-Mudsing kon diin duha ang namatay samtang laing tulo ang nasamdan.
Alas 3:30 sa hapon niadtong Huwebes, Pebrero 21, nagpulong ang mga nahisgutan sa barangay hall sa Nes-Mudsing, Midsayap apan wala damha nga mahitabo ang insidente.
Nasayran gikan kang Midsayap chief of police, Police Lieutenant Colonel Benito Aguila Rotia, Jr. nga kalit lang silang gisulod sa hall sa grupo ni Karandang Kedto ug gipamusil gamit ang mga kalibre .45 nga pistola ug M16 Armalite rifles.
Sa maong hitabo, namatay sila Macapagal Bantas Gumayao, kagawad, 54, ug Garo Talungon Mangadta, 32, tanod.
Samtang ang mga samaron mao sila Kamarudin Bantas Mangadta, 51, kapitan sa nahisgutang barangay, Abdul Radzak Sugod Dimaloloy, 25, drayber, ug Sukarno Salasal Tatalo, 43, kagawad.
Daling gisapupo ang mga biktima sa mga sibilyan ug mga sakop sa Barangay Peacekeeping Action Team ug gihatud ngadto sa Dr. Anecito Pesante Memorial Hospital sa nahisgutang lungsod ug sa North Cotabato Regional and Medical Center (CRMC) sa Cotabato City apan namatay sila si Gumayao ug Mangadta.
Giingong naangkon ang mga biktima og daghang igo sa lawas hinungdan sa ilang gidangatan.
Mga suspek daling miikyas sakay sa duha ka motorsiklo paingon sa hilit nga dapit sa Midsayap ug gipangita sa mga awtoridad samtang gisuwat kining balita Biyernes. (Edgar E. Fuerzas)