OPISYAL na nga gipahibalo sa Pag-asa nga nagsugod na ang ting-init.
Hinuon itandi sa huwaw niadtong hinapos nga bahin sa dekada nubenta medyo mubo ra ang lanat sa panahon nga kita makatagamtam og kainit.
Gawas sa mga sakit-sakit sa panit nga maoy sagad masinati, ang publiko gipasidan-an nga di magpataka og inom sa tubig nga posibling nag gikan sa way klarong tinubdan.
Way problema sa mga dapit nga may mga water refilling station nga nag-operate.
Ang pait mao kadtong nagsalig pa gihapon alang sa ilang tubig nga mainom gikan sa sandayong, tubod, puso ug tabay.
Kong magkahinay man gud ang tinubdan basin ang uban magpataka nalang og kawos bisag gipuy-an og bacteria.
Bisan gani ang mga water system nga gipadagan sa mga barangay ug kooperatiba kinahanglang alerto sab pagsusi kong permaninte ba nga nagtrabaho ang chloronization sa tinubdan.
Basin gasige lang og andar ang bomba unya ang tubig nga gisuplay sa kabalayan way klarong chloronization process nga maoy labing importante nga bahin sa usa ka delikalidad nga water system.
Daghan na ang ang nangamatay o nalandig sa tambalanan nga ang hinungdan nakainom og kontaminado nga tubig.
Aron kini malikayan ang tubig nga ibomba padung sa overhead tank kinahanglan nga mosagop ning maong proseso.
Basin nagsalig mo nga ang tubig nga inyong giinom gikan sa refilling station.
Sama diha sa mga subdivision nga bomba maoy tigsuyop sa tubig padung sa tangki.
Para nako kinahanglan gihapon nga moagi og chloronization kay kong maligo ta di malikayan nga mosud ang tubig sa atong baba.
Unya kong ang tubig may bacteria unsay garantiya nga moingon ta nga kini luwas?
Samot na kong ang maong tubig mao ra sab ang imong gigamit pag-toothbrush.
Pipila ka tuig ang nakalabay atol sa Grand Halad sa Kapamilya sa ABS CBN diha mi booth nga naghatag og libreng konsultasyon labot sa water system nga naglakip sa pagsipong sa tubig gikan sa tinubdan padung sa pundohanan.
Apil ang diskarte sa plumbing sa libreng serbisyo.
Si Pare Ben Lim ang usa sa mga expert ning maong matang sa serbisyo nagkapuliki pagpanubag sa mga pangutana gikan sa mga kliyente.
Nag-una sa ilang problema mao ang kahinay sa tinubdan nga maoy gigamit sa ilang pagpamuhi og baboy, gawas nga mao sab ni ang ilang gikuhaan sa inadlaw nga panginahanglan. Problema gihapon sa tinubdan ang gidangop niadtong nag-operate og water system sa bukid.
Garantisado ang brand sa bomba apan hinay man ang tubod.
Wa gihapoy kapuslanan. Ang ilang giingon nga mao ni ang kanunay nilang masinati panahon sa ting-init.
Bisan asa ka magpuyo mokibra gyud ang pressure kong ting-init.