SA MAKAUSA pa, mobisita na usab si President Rodrigo Duterte dinhi sa Sugbo ugmang adlawa.
Kini aron pag-indosar sa iyang mga kandidato pagka-senador sa umaabot nga piniliay nga ipahigayon karong Mayo.
Gibana-bana nga moabot ngadto sa 80,000 kapin o kulang ka mga tawo ang motambong sa maong rally nga ipahigayon sa Plaza Independencia.
Gawas sa mga senatorial candidate, posibling dili usab palabyon ang kahigayona sa pag-indosar sa lokal nga mga kandidato, ilabi na dinhi sa siyudad sa Sugbo.
Apan ang giatngan og maayo sa mga Sugboanon mao ang paukyab sa presidente nga maoy permi niyang buhaton sa matag higayon nga aduna siyay pamulong.
Lab-as pa sa atong panumdoman ang iyang mga birada ug pagpanghagit ngadto ni Daanbantayan Mayor Vic Loot kinsa iyang gihinganlan nga usa ka dakong drug protector, atol sa usa sa iyang pagbisita dinhi sa Sugbo.
Dili usab nato malimod ang pagpadayag sa iyang kasuko ug kalagot ni Cebu City Mayor Tomas Osmena nga gani iyang gibaharan nga tampuroson kon iyang ikasugat.
Ang kalagot sa presidente ngadto sa mayor nagagumikan sa pagpagawas ni Osmena sa tulo ka mga tawo kinsa nadakpan tungod sa pagpamaligya og mga ilegal nga butane cannister.
Way nasayod kon balikon ba sa presidente ang pagpadayag sa iyang kalagot ni Osmena ug ni Loot niining higayona.
Apan ang gipaabot nga makahatag og dugang interest sa mga Sugboanon ning iya karong pagbisita mao ang isyu sa kamatayon sa 19-anyos nga si Ashley Abad kinsa giingon nga na overdose sa party drugs atol sa usa ka konsiyerto niadtong Sinulog.
Hinaot nga iya kining mahisgutan aron mahatagag katin-awan ang tanan ilabi na kon diin ug kinsa ang tinubdan ni Abad sa maong party drugs nga mikatap karon sa Sugbo.