SECTIONS
Thursday, March 21, 2019
SUPERBALITA CEBU

Bulacao river limpyohan; view deck sa Butuanon river gilusad

DOS mil ka mga boluntaryo ang gipaabot nga mosalmot sa clean-up drive sa Bulacao river nga karong adlawa, Sabado, Pebrero 23.

Kini human mihimo og anunsyo si Mayor Tomas Osmeña niadtong Pebrero 1 sa iyang Facebook account kabahin sa pag-organisa og pagpanglimpyo sa mga suba sa Bulacao, Lahug, ug Guadalupe.

Matod ni Kanhi Konsehal Nida Cabrera, paunglo sa Cebu City Environment and Natural Resources Office (CCENRO), nga kapin sa usa ka libo ang narehistro sa ilang buhatan nga mo boluntaryo sa pag-apil og pagpanglimpyo sa Bulacao river.

Si Cabrera nisaysay nga adunay mga pribadong organisayon ug mga institusyon ang moapil sa clean-up drive, labot na usab nga moboluntaryo sa pagpalimpyo ang mga tunghaan sa Sugbo.

Kasagaran sa mga nagpalista nga mo boluntaryo mao ang mga trabahante sa Business Process Outsourcing (BPO) companies ug mo apil sab sa clean-up drive ang mga grupo sa Alpha Kappa Rho ug Tau Gamma.

Magsugod ang maong clean up drive sa Bulacao river alas 6:30 sa buntag og mahuman kini’g alas 10 sa buntag.

“Alas 6:30 sa buntag, mahuman mga 10 o’clock sa buntag mahuman..,” sigon ni Cabrera

Aduna pa sab umaabot nga clean-up drive alang sa Lahug River karong Mraso 9 ug Guadalupe River karong Marso 16.

Sa gustong moboluntaryo sa mga clean-up drives, kontak sa CCENRO sa 253-6362 ug 411-0140.

Sa laing bahin, pormal nga gilusad ang viewing deck sa Butuanon river sa dakbayan sa Mandaue ug ang dungan nga pagpanglimpyo sa 10 priority rivers sa tibuok Central Visayas, Biyernes alas 6:30 sa buntag, Pebrero 22.

Pinangulohan sa Department of Environment and Natural Resources (DENR) 7 director Gilbert Gonzales, nihimo og kapin sa usa ka oras nga pagpanglimpyo diha sa pipila ka parte sa sapa sa Butuanon sa samang adlaw.

Dul-an sa 300 ka mga niboluntaryo nga mohimo og pagpanglimpyo, gikan sa mga pulis, sundalo, mga tinun-an, nagkadaiya nga ahensya sa gobyerno, sakop sa clean and green ug mga kawani sa pipila ka pribado nga kompanya.

Gitug-an ni Gonzales nga ang programa usa sa mga paagi sa pagtubag sa hagit ni Environment Secretary Roy Cimatu atol sa gipahigayon nga International River Summit sa Sugbo niadtong Nobyembre sa miagi nga tuig, alang sa pagpabalik sa kalimpyo sa kasapaan sa tibuok nasud.

Atol sa 4th IRS ang Butuanon river ang nahimo usab nga model river, gikan sa kanhi gihulagway nga susama’g patay na nga sapa ngadto na sa hinayhinay nga kalimpyo, hinungdan nga diha gihimo ang paglusad sa programa nga Rivers for Life.

Anaa usab si Department of Tourism (DOT-7) director, Shalimar Tamano, kinsa nitug-an nga ang pagpanglimpyo sa kalikupan ang nag-una usab nila nga kawsa isip kabahin sa ilang sustainable tourism.

Gawas sa Butuanon river, laing duha dinhi sa Sugbo ang sapa sa Bulacao sa dakabyan sa Sugbo ug ang sapa sa Luyang, lungsod sa Carmen sa amihanan nga bahin sa probinsya sa Sugbo ang nalakip sa 10 priority rivers ug ang uban ang anaa sa lalawigan sa Bohol, Siquijor ug Negros, kinsa ninghimo usab sa ilang subsob nga pagpanglimpyo.

Gipasabot ni Gonzales nga ang napulo ang lakip sa na-classify nila sa Class C river kun sapa nga nakit-an nila nga mahimo pang pangisdaan.

Ang class B river, mga sapa nga mahimo nga kaliguan ug ang class A, mao ang tubig sapa nga mainom ubos sa treatment process.

Matud ni Gonzales nga ang Rehiyon 7 ang adunay di mominus 500 ka mga sapa. (FMD, Kiziah Marie T. Suello - USJ-R Intern)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!