NAGBALOR sa P8 milyones nga mga punoan sa marijuana ang gipang-ibot sa mga sakop sa Provincial Mobile Force Company (PMFC) sa Cebu Provincial Police Office sa pakig alayon sa Balamban police station ug Philippine Drug Enforcement Agency- Central Visayas sa Sitio Ko-o, Barangay Gaas, lungsod sa Balamban, adlawng Biyernes, Pebrero 22.

Gisugdan ang pagpangibot sa mga punuan sa marijuana ala 6 Biyernes sa buntag, Pebrero 22, sa gibana-bana 20,000 ka fully grown nga mga marijuana sa maong lugar.

Matod ni Superintendent Rene Kyamko, ang hepe PMFC, nga ilang nailhan ang nananom sa mga marijuana nga si Donito Ocariza, hingkod ang pangidaron, nga nag puyo ra usab sa maong barangay.

Usa sa mga civilian agent sa kapulisan ang mihatag sa kasayuran niadto pang milabayng mga semana nga maoy hinungdan nga ila kining gipa subay.

Niadtong Huwebes, Pebrero 21, ilang gipa kompermar ang dapit kung unsa ka tinuod ang ilang nadawat nga kasayuran ug sa dihang positibo kini milusad dayon sila og operasyon.

Wala na nila madakpi ang mag uuma nga nag tanom sa mga marijuana matod ni Supt. Kyamko ug dako ang posibilidad nga nakamatikod kini sa ilang presensya.

Gipang sunog sa mga operatiba ang pipila ka mga naibot nga punoan sa marijuana sa dapit samtang nagdala sila og pipila ka ebedensya alang sa pagpasaka og kaso sa nag tanom niini.