NAPAUBOS na ang klasipikasiyon sa siyudad sa Cagayan de Oro human kini nalakip sa grave concern alang sa umaabot nga eleksiyon karong bulan sa Mayo diin gikan sa “code red” anaa na lamang sa “code orange.”
Nasayran nga ang code red giingong aduna’y upat ka mga basehan sama sa presensiya sa armadong grupo, duna’y nahitabong insidente nga duna’y koneksiyon sa eleksiyon, ug mga nagpapili nga nalambigit sa ilegal nga druga.
Matud ni Police Superintedent Mardy Hortillosa, tigpamaba sa Cagayan de Oro City Police Office, atol sa press conference niadtong nilabay nga adlaw nga napaubsan ang klasipikasiyon sa siyudad apan sa giingong sa upat ka parameters duna’y duha ang siyudad.
“Ang atong tagging karon is Comelec (Commission on Elections) area of immediate concern, code orange ta,” matud ni Hortillosa.
“If naay duha ka parameter nga na shoot like for example nga ang pula, out of ana naa tay duha maihimo tang orange,” dugang niini.
Giingong dili usab niini ma-question ang Camp Crame ilabi na nga sila ang nagbutang sa mga parameters apan kung basehan ang kanhi parameters dili malakip ang siyudad diin kaniadto wala kining mga New People's Army ug politiko nga nalambigit sa druga ang apil sa parameters.
Lima ka klasipikasiyon ang makonsiderang “hot spots” diin giklasipikar nga ang dapit nga kontrolado sa Comelec, code red o areas of grave concern, code orange o areas of immediate concern, code yellow o areas of concern, ug code green o walay security concern. (KCS)