GIBUTYAG ni Misamis Oriental Governor Yevgeny Vincente Emano nga dili angayan mosulti si Cagayan de Oro Mayor Oscar Moreno nga walay nada ang programa nga MisOr Cares.
“Ang atong MisOr Cares natawo tungod sa kapalpakan ni Moreno,” kini ang butyag ni Emano sa iyang programa sa radyo.
Matud ni Emano nga ang MisOr Cares namugna niadtong Hulyo 7, 2014 sa iyang inisyatiba human nagbilin si Moreno ug dako kaayo nga bayrunon sa Philhealth nga wala tanan napuslan sa mga taga Misamis Oriental.
“Nagbilin siya kanato og utang ug nakurat ako nga gipanuktan ako sa Philhealth og P243 milyon kay wala niya gibayran,” matud niini.
Dinhi sab niya nasusihan nga nagbayad kini og sobra sa ihap sa gidaghan sa pamilya sa probinsya.
“Ang sakit kay paghawa niya kay gibalhin siya sa siyudad gibilin sa utang sobra pa sa kadaghanon sa pamilya iyang gibayran. Ehemplo kon ang Misamis Oriental adunay 100,000 ka household ang iyang gibayran 150,000 ka household unya dili makita asa kanang singwkenta unya dili makita asa na nga mga tao ang gibayran,” dugang niini.
Sa pagkakaron moabot na ngadto sa 1.5 milyon ka Misamisnon ang giingong nakabenipisyo niini basi sa report sa MisOr Cares.
Gani ang MisOr Cares 80 porsinto sa gapangayo og tabang niini taga Cagayan de Oro unya dili kini sila gabalibaran.
“Moingon siya walay nada wala may iya,” dugang niini. (SVB)