PATAY ang usa ka lalaki kinsa bag-o lang nakagawas sa prisohan human giingong misukol sa operasyon sa kapulisan niadtong 7:55 Biyernes sa gabie, Pebrero 22, sa 11th-15th Street, siyudad sa Cagayan de Oro.
Bisan pa man kon wala nay kinabuhi apan mag-atubang gihapon og daghang kaso si Roger Sersa kinsa bag-o lang nakagawas sa Davao Penal Colony (Dapecol) sa kasong robbery with homicide.
Si Sersa giingong nagdala usab sa pangalan nga Roger Fernandez alyas Kwek-Kwek, giingong naila sa pagpanulis ug pagpanion.
Nasayran nga atol sa maong operasiyon kalit lang nga namusil si Sersa ug maayo na lamang nga nakatago ang operatiba sa kahoy.
“Una gyud siya nakapabuto, maygani abtik pud atong operatiba nakalikay pud siya diretso, nakatago sa kahoy,” matud ni Police Senior Inspector Teodoro De Oro, hepe sa Police Station 9 sa Macasandig.
Gibutyag usab ni De Oro sa Sun.Star Superbalita nga ipasaka gihapon ang mga kaso batok kang Sersa bisan kong kini patay na.
“Among klaruhon ang identification, e-file gihapon namo ang kaso sa iyaha katong pusil ug sa granada nga nakuha ug sa buy-bust, maapil gihapon sa gunban,” matud ni De Oro.
Gidugang pa niini nga ubay-ubay ang gigamit niini nga ngalan ug gani duna usab kini laing kaso nga frustrated homicide.
“Mao pa na among sutaon lage kay iyang ngalan Roger Sersa, pag-ukay namo sa iyang pitaka Roger S. Fernandez. Naa pud sa lain unit ang iyang dal-on nga ngalan “Allan” pud daw, daghan iyang ngalan gigamit kay mangunguot man siya, panghold-up, pagtutok sa mga batan-on,” dugang niini.
Dali pa nga gidala sa J.R Borja General Hospital ang suspek apan nakabsan kini sa iyahang kinabuhi paghidangat sa balay tambalanan human nakaangkon og mga samad pinusilan sa nagkadaiyang parte sa iyahang kalawasan.
Nakuha gikan sa crime scene ang kalibre .38 lakip na ang granada gikan sa suspek ug buy-bust money nga P500 ug gitoohang ginadiling druga.
Ang patay nga lawas ang kasamtangang nagpabilin sa morgue sa maong ospital.