NA-RESCUE sa tinugyanan sa Regulatory and Complaint Board (RCB) ug City Social Welfare and Development (CSWD) ang upat ka mga menor de edad ug nakumpiska ang usa ka unit sa tolilong sa Barangay Agusan, siyudad sa Cagayan de Oro, niadtong Huwebes, Pebrero 21.
Ang upat ka mga menor de edad anaa sa mga pangidaron nga 14 anyos hangtod sa 15 anyos diin human sa maong panghitabo gidala na sa hingtungdan nga ahensiya.
Sa pakighinabi ngadto kang Antonio Resma Jr., member ug Inspectorate team leader sa RCB, nga nakurat sila sa dihang duna’y impormasiyon nga ilang nadawatan sa maong dapit nga duna’y tolilong.
“Pag-operate nato sa Agusan ang target gyud katong bilyaran pero pag-operate naa ma’y nag info nga naa pod tolilong within the area mao tong na confiscate ang usa ka tolilong,” matud ni Resma.
“Natingala pa gani mi nga naa pay sobra-sobra niana kay so far gyud murag kay taod-taod naman gud nga wala mi nangakuha niana,” dugang niini.
Matud niini nga nasapon nga anaa sa sulod sa bilyaran ang mga minor oras pa sa tingklase.
“Naa’y upat pud ka mga minors nga na-rescue didto although wala sila nasapon nagdula pero naa sila didto sa sulod, ginabawal man ang mga minor lage magdula labaw na sa tingklase nga oras ug wala pud ang ginikanan,” matud ni Resma.
Padayon ang pagpahimangno sa tinugyanan sa RCB ngadto sa mga kabataan, ginikanan, ug sa mga patigayon sa ilang hugot nga kampanya nga magpabilin nga maangkon sa siyudad ang “child friendly city.” (KCS)