TIKLO ang usa ka suspek kinsa mibisita sa usa ka bilanggo human nga nagdala kini sa ginadiling druga niadtong Huwebes, Pebrero 21, mga alas 12:30 sa udto, sa Misamis Oriental Provincial Jail nga nahimutang sa Genearal Antonio Luna Street, siyudad sa Cagayan de Oro.
Ang suspetsado naila nga si Robert Ensoy, 34, ulitawo, kinsa residente sa Barangay Puerto ning siyudad.
Sa nahipos nga impormasiyon gikan sa Police Station 2 sa Cogon gikabutyag nga nibisita sa usa sa mga bilanggo si Ensoy apan sa pagsusi sa Jail prison guard sa lawas sa suspek nakuhaan kini og usa ka pakete sa gitoohang shabu hinungdan nga ila kining gisikop.
Ang maong gitoohang shabu gibanabanang anaa sa mga P1,500 nga kantidad diin duna’y gimbug-aton nga mga anaa sa 0.15 gramo.
Ang mga nakuha nga ebedensiya gidala na sa Philippine National Police crime laboratory aron nga masuta ug mapailalom sa eksaminasiyon. (KCS)