PITO ka mga samad pinusilan ang naangkon sa suspetsado kinsa giingong nisukol sa kapulisan atol sa buy-bust operation mga alas 5:10 sa hapon niadtong Huwebes, Pebrero 21, sa Aluba, Upper Macasandig, siyudad sa Cagayan de Oro.
Gidala pa sa Northern Mindanao Medical Center (NMMC) ang suspek nga nailang si Jason Cuizon, ulitawo, nga taga Tangkongan, Pinikitan, Barangay Camaman-an ning siyudad, apan nakabsan kini sa hinulamang kinabuhi.
Sa nahipos nga inpormasiyon gikan sa Police Station 2 sa Cogon gikabutyag nga nagpahigayon og buy-bust operation ang kapulisan ubos sa superbisyon ni Police Senior Inspector Dennis Quindara nga unang namusil ang suspek ug gani naigo pa ang usa sa mga pulis apan swerteng naka-vest o bullet proof kini ug wala nilahos ang bala.
“Nung magpakilala na po yung mga pulis natin para arestohin siya e bumunuot po ng baril itong ating suspek at agad pinutokan ang police officer na tinamaan sa dibdib luckily ito ay naka vest kaya hindi tumagos yung balang tumama sa kanyang katawan” matud ni Quindara.
Gidugang pa niini nga kini hinungdan nga nibalos ang kapulisan ug nakaangkon og ubay-ubay ka mga samad pinusilan ang suspek.
“Kaya gumanti na po ng putok yung ating mga pulis at yun tinamaan nga po, yun ating suspek dinala sa NMMC at dineklarang dead on arrival,” dugang niini.
Sa pakighinabi ngadto kang Police Inspector Paul Jean Ragmac, sa Scene of the Crime Operatives- Northern Mindanao, nga nakaangkon ang suspek og mga samad diha sa atubangan ug likod apan masayran lamang kini pinaagi sa otopsiya aron masuta kung asa ang entrance ug exit sa mga samad.
“Upat sa atubangan, naa’y samad nga tulo sa likod so posible nga lagbas kini sa autopsy lang nato mahibal-an kung pila gyud kaning upat asa ang exit ug asa ang entrance,” matud ni Ragmac.
Nakuha gikan sa crime scene ang usa ka kalibre 45 diin duna’y usa ka bala ug magazine lakip na usab ang tulo ka mga 9mm. Samtang napalit gikan sa suspek ang usa ka pakete sa gitoohang shabu ug buy-bust money diin gibana-banang anaa sa P3,000.
Sa pagsulat niini nga balita pabilin pa ang patay nga lawas nga anaa sa punerarya human nga wala pa nahidangat ang pamilya niini.