LABIHAN ang kakurat sa amahan dihang pagbira sa pisi sa atabay iyang anak ang nakita naghikot ug pisi sa liog ug wala nay kinabuhi sa Brgy. Casinglot, lungsod sa Tagoloan, Misamis Oriental.
Giila ang biktima nga mao si Kenneth Gala, 17, residente sa susamang dapit.
Matud sa amahan nga si Roquillo nga dugay siya nakatulog niadtong gabii sa adlawng Miyerkules, Pebrero 20, kay wala pa nakauli si Kenneth.
Ang iyang higala miingon nga gikan kini nag-inom apan miuli na sa puloy-anan.
Apan buntag na nadiskubre dihang magkalos unta og tubig sa atabay si Roquillo natingala siya nga ang pisi sa timba toana sa ubos nga bahin ug sa iyang pagbira bug-at kini kaayo.
Nagpatabang kini sa iyang mga silingan sa pagbira ug maoy nakita ang iyang anak nga naghikot sa liog gamit ang maong pisi sa timba.
Dili pa masulti sa amahan kung unsay rason sa paghikog niini apan kung pamilya maayo ug wala silay mga problema gani nagtungha kini sa Grade 11 ug adunay mga pangandoy.
Giingong adunay uyab ang biktima apan wala pasab nila masuta kon aduna bay giawayan nga usa sa posibleng hinungdan sa paghikog niini.