DRUGAS ang motibo sa nahitabong pagpamusil sa Barangay Danglag, lungsod sa Consolacion, nga miresulta sa kamatayon sa upat ka mga tawo, Biyernes sa hapon, Pebrero 22.
Matod ni Police Regional Office 7 Chief Superintendent Debold Sinas nga ang target sa mga suspek mao ang kanhi pulis nga si Jeremias Miñoza Herbieto, 52, taga Magdagook sa maong lungsod.
Gikumpirma ni Sinas nga usa sa mga namatay nga si Joel Cabardo, taga siyudad sa Davao, bag-o lang nakagawas sa Davao Penal Colony (Dapecol) nga aduna’y kaso bahin sa ilegal nga drugas. Samtang si Adrian Manlisi Cabunelas, taga Pulpogan 2, Consolacion, ang giingon nga mao'y nagsilbing escort sa kanhi pulis ug nalakip usab sa drug watchlist sa kapulisan.
Nagduda ang heneral nga aduna usab nabangga si Herbieto nga mga drug personalities sa Sugbo mao'y hinungdan nga gipatay kini.
Wala malakip sa listahan sa mga drug personalities si Cabardo sanglit bag-o lang kini naabot sa lungsod sa Consolacion.
“Siya kase wala sa radar sa PNP (Philippine National Police) kay bigla lang siya, mikalit lang og abot diri, so we're checking kon kinsa 'tong nag-target sa iyaha,” matod ni Sinas.
Ila usab ipasubay kon aduna'y koneksyon ang nahitabo sa Consolacion sa nahitabong ambush sa Barangay Pit-os sa siyudad sa Sugbo diin ang biktima mao si Joselito Junio, taga Samar, Leyte, niadtong Pebrero 17.
Si Junio giingong big time drug pusher sa Samar. Matod pa, tawo kini sa usa ka politiko nga nalakip sa listahan ni Presidente Rodrigo Duterte sa ilegal nga drugas.
Lakip sa ilang sutaon kon aduna ba siya'y kalambigitan sa pagpadagan sa ilegal nga drugas sa siyudad sa Mandaue nga adunay pito ka kilos nga shabu ang nasakmit.
Si Herbieto bag-o lang nakapiyansa sa kaso nga illegal possession of firearms sa korte sa siyudad sa Mandaue human siya masikop sa kapulisan sa milabay nga buwan.
Si Senior Police Officer (SPO) 3 Emerito Sansan, ang imbestigador sa Consolacion Police Station, miila nga sa laing namatay nga unang unidentified nga si Wilmer Lawas, taga Langusig, dakbayan sa Danao.
Matod ni SPO3 Sansan nga silang Cabunelas, Cabardo ug Lawas mao'y nagsilbing bodyguard ni Herbieto ug aduna sila'y nadawat nga impormasyon nga nalambigit usab kini sa ilegal nga drugas ug gun-for-hire.
Sigun sa pamahayag sa asawa sa kanhi pulis nga si Geraldine Herbieto, duha ka riding-in-tandem diin ang mga sakay niini pulos nakatabon ang nawong.
“Base sa atong investigation, makita nato nga ang target is ang police unya since gi-hire ni niya nga murag mga ‘bata-bata’ niya nga mao'y mouban niya sa pag-uli, mao nang sila ra ang gitira kay ang asawa wala man hilabti,” matod ni Sansan.
Tungod kay ang asawa nakakita sa mga suspek, mahimong kuhaan nila kini og pamahayag.
Aduna'y daghang nakasaksi sa nahitabo apan nagdumili kini sa pag-kooperar sa kapulisan tungod sa kahadlok.
Lakip sa ilang subayon ang mga kuha sa closed-circuit television camera sa mga establisamento sa dapit aron makagiya sa ilang imbestigasyon.
Nakig-alayon sila karon sa Dapecol aron makuha ang background ni Cabardo human masayod nga nabilanggo na kini tungod sa ilegal nga drugas.
Sa pagkakaron, blangko pa ang kapulisan kon kinsa ang upat nga suspek nga mao'y nipusil sa mga biktima. (AYB)