SUPERBALITA CEBU

520 nadakpan, 9 patay sa Sempo

MOABOT na sa 520 ka mga tawo ang nasikop, atol sa 30 ka oras pa lang nga pagpahigayon sa Synchronized Enhanced Managing Police Operation (Sempo) sa Police Regional Office (PRO) 7.

Samtang siyam ang napatay ug moabot sa P31 milyones nga balor sa mga nagkadaiyang ilegal nga drugas, lakip na ang marijuana ug ecstasy ang mga nasakmit.

Ang 48 ka oras nga Sempo, gisugdan niadtong Huwebes sa alas 12 sa kaadlawon, Pebrero 21, ug tapuson human alas 12 sa kaadlawon, Pebrero 24.

Ang gihatag nga data sa PRO-7 ang report kutob pa lang alas 6, Sabado sa buntag, Pebrero 23.

Gitug-an ni PRO-7 director, Police Chief Superintendent Debold Sinas nga 194 ang nasikop tungod sa kalambigitan sa ginadili nga drugas, 139 ang nahimo nga buy-bust, 15 ang nasikop pinaagi sa pagpatuman sa warrant of arrest ug lima sa search warrant may labot sa drugas.

Sa mga nasikop, 13 kanila ang street level target sa drug watch list, ug ang uban mga newly identified personalities, apan duha kanila nasuta nga mahimo nga High Value target.

Aduna na usab natala nga 9 nga napatay atol sa Sempo, upat kanila ang nisukol atol sa gihimo nga buy-bust, giila sila nga si Ken Kenneth Rosales, kinsa naila nga dakong ecstasy supplier sa Sugbo.

Laing napatay sa buy-bust sila si Marvin Veloso alyas ‘Labad’ sa barnagay Looc, dakbayan sa Mandaue. Ang Cordova Police Station nitala usab og duha ka fatality nga sila Librador Abayan ug usa ka naila lang nga ‘Moises.’

Samtang ang laing lima nga namatay ang giingon nga nisukol atol sa papatuman sa search warrant. Naila kini nga sila Christorhey Montiadora sa lungsod sa Daanbantayan, Leonedis Barcelona sa syudad sa Carcar.

Ang laing tulo sa dakbayan sa Sugbo mao si Reynaldo Laguna ug Renato Goc-ong, diin giingon nga naangin ang asawa nga si Emma Goc-ong kinsa giingon nga nitabon sa iyang bana atol sa pagpinusilay tali kang Renato ug sa mga pulis.

Atol sa maong pinusilay, nasamdan usab si PO3 Pacheco Pulgo.

Samtang 136 ka mga tawo ang nasikop pinaagi sa pagpatuman sa warrant of arrest, diin upat niini ang mga anaa sa Most Wanted nga listahan, nalakip na usab niini ang 15 ka mga may labot sa ginadiling drugas.

128 ang mga nasikop tungod sa illegal gambling.

Aduna usab gipahigayon nga tulo ka mga operasyon sa illegal fishing, duha sa probinsya sa Sugbo ug usa sa lalawigan sa Bohol, diin moabot sa 14 ka mga tawo ang nasikop.

Atol sa buy-bust, adunay 11 ka mga armas ang nasakmit.

Gihimo usab ang lain pa nga operasyon sama sa Comelec checkpoint, diin adunay 33 ka mga tawo ang nasikop ug nakuhaan og armas.

Kinse ka mga tawo usab ang nasikop atol sa pagpatuman sa Search Warrant kalabot sa pagtinir og armas nga wa'y lisensya, apil na niini ang duha ka mga kapitan sa siyudad sa Sugbo.

Sa gipahigayon nga "Oplan Katok," alang sa pag-awhag sa pag-surrender sa ilang mga wala ma-renew nga armas, adunay 103 ang gi-turnover ngadto sa mga pulis, 63 niini sa CPPO, 29 sa Negros Oriental, upat sa Mandaue City, upat sa lalawigan sa Bohol ug tulo sa Cebu City.

Ang maong ihap sa mga dinakpan og masakmit nga mga ilegal, gitug-an ni Sinas sa mga tigbalita, atol sa press conference, Sabado sa buntag, Pebrero 23, nga posible pa nga mosaka,atol unya sa himuon nga dugang pagtaho sa kapulisan, Dominggo, Pebrero 24, human na sa tanang operasyon sa 48 oras nga pagpatuman sa Sempo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph