SAGUBANGON sa Team Pilipinas ang ilang katapusan ug mahinungdanong tahas sa FIBA World Cup Asian qualifiers sugod karong alas 10:30 sa gabii (RP time) batok sa host Kazakhstan.
Ang kadaugan sa Team Pilipinas ning kombatiha makahayag sa ilang poruhan nga maka-qualify sa prestihiyusong 2019 FIBA Basketball World Cup nga ipahigayon karong Agusto sa China apan wala kini nagpasabot nga segurado na silang makaduwa sa matag upat ka mga tuig nga kompetisyon.
Aron makaseguro sila og luna sa World Cup, kinahanglang modaog ang Team Pilipinas ning duwaa unya mag-ampo nga mapilde ang duha sa mga nag-una kanila sa standing sa Group F nga mao ang Iran ug Japan sa katapusan sab niining tahas batok sa lainlaing kontra.
Sa Group F, ang nakaseguro pa lang og puwesto sa World Cup mao ang group leader nga mao ang Australia, nga adunay 10-1 nga rekord.
Nagsunod ang Japan ug Iran nga parehong adunay 7-4 nga rekord samtang naa sa ikaupat ang Team Pilipinas nga naghupot og 6-5 nga rekord.
Ang Kazakhstan (4-7) ug Qatar (2-9) mao ang wala na’y parehong poruhan gikan sa Group F.
Basi sa format, ang mopatigbabaw nga tulo sa Group F ug hasta sa Group E mao ang maka-qualify sa World Cup lakip na ang 4th placer gikan sa duha ka mga grupo nga adunay mas taas og standing.
Kon modaog ang Team Pilipinas batok sa New Zealand unya mapilde ang Iran batok sa Australia ug ang Japan batok sa Qatar, hayan makuha sa mga Pinoy ang No.2 spot unya mokanaog sa ikatulo ang Japan ug ikapat ang Iran.
Puwede sab nga makaderetso sa World Cup ang Team Pilipinas kon ikatabla niini sa standing ang Japan pinaagi sa quotient.
Kon parehong modaog ang Iran ug Japan, hayan malansang nang daan ang Team Pilipinas sa ikaupat nga luna sa Group F bisan unsa pa’y resulta sa ilang duwa batok sa Kazahkstan.
Ning sitwasyuna, wala na’y kontrol ang Team Pilipinas sa ilang kaugmaon gumikan kay mag-ampo na lang sila nga mas taas sila og standing sa mahimong 4th placer sa Group E.
Kasamtangang nag-una sa Group E mao ang New Zealand (9-1) unya nagsunod ang Korea (8-2), China (6-4), Lebanon (6-4), Jordan (5-5), ug Syria (2-8). Isip China, ang China nakaseguro nang daan og puwesto sa World Cup.
Batok sa Kazakhstan, ang gikabalak-an sa Team Pilipinas mao ang bag-ong naturalized player sa host squad nga mao si Anthony Clemmons, kinsa nagpakatap og 31 puntos sa miaging duwa sa Kazakhstan diin napilde sila sa Australia, 60-81.
Mao kini ang labing unang higayon nga ikasangka sa Team Pilipinas ang Kazakhstan nga anaa si Clemmons. (ESL)