60,000-100,000 ka mga tawo anaa sa pag-ari ni Duterte

GIBANA-BANA nga moabot sa 60 ngadto sa 100 ka libo ka mga tawo ang gipangandaman sa kapulisan sa Police Regional Office (PRO)-Central Visayas nga modugok sa sulod ug gawas sa Plaza Independencia, sa dakbayan sa Sugbo, Dominggo sa hapon hangtud gabii, Pebrero 24.

Kini matud ni Chief Superintendent Debold Sinas, director sa PRO-Central Visayas, alang sa kalihukan sa PDP Laban, diin motambong si Pangulo Rodrigo Duterte.

Ang maong kalihukan tambungan, dili lang sa mga sakop sa maong partido lukop probinsya sa Sugbo uban na sa ilang mga supporters, anaa usab ang pipila nga magpapili sa pagka-Senador.

Hinungdan nga gipahibalo ni Sinas nga nasabutan nila sa Presidential Security Group (PSG), nga idili gayud ang mga backpack sulod sa Plaza Independencia.

“Una, among gipahibalo tanan sa publiko, and we have agreed with the organizer, nga bisan kinsa, bisan media, organizer, absolutely no backpack, pwede ra bag nga ginagmay, mga shoulder bag, sling bag, kay kon naa moy backpack, dili gyud mo pasudlon. And the PSG strictly instructed us nga wala gyud backpack, labi na magtuyok-tuyok sa sud,” gipahibaw ni Sinas.

Gilantawan nga ala una pa lang sa hapon, mag-abot-abot na ang mga tawo, magsugod ang programa sa alas 3 sa hapon.

Gitug-an ni Sinas nga niadto pa lang Byernes, na-secured na ang tibuok lugar, uban na sa ilang pakig-alayon sa PSG, gipahimutang na usab ang kinahanglang pwersa kapulisan, kasundaluhan, uban pa nga law enforcement unit, ug lakip na ang K9 unit.

Anaa usab ang upat ka mga barko sa Philippine Coastguard nga naka-patrolya ug nagbantay sa kadagatan duol sa venue.

Gipahibalo ni Ruby Villaverde sa MARO nga una nga tambungan ni Presidente Duterte ang pagpang-apud-apud sa grants ngadto sa 1,500 ka mga unconditional cash transfers beneficiaries, diha sa Cebu Technological University. Himuon kini sa alas 6 sa gabii.

Gawas kang Duterte, anaa usab si Department of Social Welfare and Development Secretary Rolando Bautista.

Sa alas 7 sa gabii, giingon nga molabang dayon ang Pangulo alang sa pagtambong sa PDP Laban rally ug senatorial proclamation.

Diin sa ilang programa, dawaton ang pangulo sa Cebu 3rd district representative, Gwendolyn Garcia, Cebu City vice mayor Edgardo Labella, ug Richard Yap, ang mokandidato sa Cebu City sa North district sa pagka-kongresista.

Gawas sa mga ipang-proklamar nga mga magpapili sa pagka-senador ubos sa partido nga PDP Laban, anaa usab ang uban pa nga mga senador.