DAKO ang kahibulong ni Blesilda namuklas sa mga hinayhay nga linabhan sa luyo sa ilang balay, kay may nakit-an siyang maanindot nga sinina, usa ka bestida nga puti ang kolor. Sa iyang pangagpas dato kaayo ang tag-iya niini. Hilabihan kaanindot ang maong bestida. Daw wala pa kini magamit ug humot kaayo. Karon pa siya makakita og ingon niini kaanindot nga sinina. Talagsaon kini ug ang kahumot daw iya kini sa usa ka prinsesa. Nagpangidlap kini daw gidayanan og mga diyamante.
Gikulbaan si Blesilda. Segurado gyud nga nangita na ang tag-iya niini. Kon masayran sa tag-iya nga anaa kini kaniya, ipabilanggo gyud siya niini.
Unya may nahinumdoman siya nga usa ka hapon niana miadto siya sa siyudad sa Sugbo aron pagpalit og bestida nga iyang isul-ob isip kandidata sa “Miss Matahom” indigay sa kaanyag sa umaabot nga pista sa ilang balangay. Sa iyang pagpauli may mibabag sa iyang agianan. Nagsakay sila og mga motorsiklo. Tulo ka lalake nga may angkas nga mga babaye. Mikanaog ang usa sa mga babayeng angkas ug giatubang si Blesilda. Hain ang tinan-awan niini nga mitulisok kang Blesilda.
“Hoy, Blesilda, atras na lang pagka kandidata aron way dautang mahitabo nimo!” singhag sa babaye. Di ka angayan nga mahimong ‘Miss Matahom’ sa atong balangay!” Unya gibunlot niini ang pinalit niya nga bestida alang sa umaabot nga ‘beauty contest’ ug giitsa kini ngadto sa kanal. Way nahimo si Blesilda niining higayuna. Igo na lamang siya nga nagpatulo sa iyang mga luha. Wala gayud siya makaila kanila. Nagtuo siya nga may nagsuhol nila nga may kalabutan sa indigay sa katahom. Basin og dumadapig sa kontra niyang mga kandidata. Sanglit kanunay man siyang moguwang mananaog, giplanuhan nga dauton siya.
Dihang namiya na ang mibabag kaniya, may miduol kang Blesilda nga usa ka matahom nga babaye. Sa iyang banabana talidngan niya kini og edad. Puti ang pamanit sa babaye nga nagsinina og puti. Gipahiran niini ang mga luha ni Blesilda sa puti nga panyo.
“Ayaw kahadlok kanako, Blesilda. Usa ako ka tinuod nga higala ug dili dautan,” matod sa babaye.
“Kinsa man ka, Miss, ug unsay imong ngan?” nangutana si Blesilda. “Diin man ka magpuyo ug nganong nakaila man ka nako? Ako wa makaila nimo!”
“Dili pa panahon nga magpaila ko kanimo,” tubag sa babaye. “Nasayod ko kon unsa kamahinungdanon kanimo kadtong imong pinalit nga bestida kay usa man ka ka kandidata sa umaabot nga pasundayag sa inyong pista. Timan-i kini, usa ka maanindot kaayong bestida nga wala pa ninyo makita dinhi sa inyong kalibutan ang ihatag ko kanimo.”
GIPAKITA ni Blesilda sa iyang Mama Anna ang nindot nga bestida nga gikahibulong kaayo sa iyang inahan. Nahinumdom siya nga ang maong sinina hinatag sa babaye kaniya niadtong miaging mga adlaw.
Miabot ang adlaw nga maoy gipaabot sa tanan. Mipaso na ang kawhaan ka kandidata sa entablado.
Nagkalawom na ang gabii. Dako ang kahibulong sa mga tawo sa bestida ni Blesilda kay sulaw kini kaayo. Sa ‘Question and Answer’ natubag niya ang tanan. Unya may nanaka sa entablado. Ang mga tawo kini nga nagsakit kang Blesilda kaniadto. Ila untang ihulog si Blesilda ngadto sa yuta, apan gipakgang sila sa higala ni Blesilda nga mikalit lag tunga sa entablado. Gipanghagbong sa ubos.
Nakita ni Blesilda ang mga panghitabo. Nakita niya ang iyang higala nga nagpahiyom kaniya. Midaog si Blesilda tungod sa kaanindot sa iyang bestida nga hinatag sa higala niyang engkantada. (KATAPUSAN)