USA sa akong malingawan sa biseklita ang mga pareho nakog bisyo, labinag kanang naay mga tabian kaayo. Bisan di mo kaila, kalit lang mong magkaamigo. Sama kaniadto mag estambayan pa ko sa Aison Bikeshop ug sa ilang Jay Garganera.
Daghan ko og mga nahimong higala tungod lang sa biseklita. Kaniadto, sagad ra sa akong mga higala mao ang circle sa journalists, classmates sa elementary, high school ug college. Apan sa pag-apil nako sa biking activities, daghan ko og mga nakaila. Usa ra ang sinugdanan sa sugilanon, parte sa biseklita.
Lainlain og mga rason ang pagtindak. Sa akoa ug sa akong pamilya mao ang kamatayon sa usa nako ka anak.
Ang uban kay tungod sa ilang pag survive sa sakit dala sa edad ug pagpasagad sa pagkaon. Sama niadtong mga dunay diabetes ug uban pang mga sakit. Gikinahanglan nila ang pag-exercise mao nga nagbiseklita sila.
Ang uban ila rang hilig ang mag bike sud na sa pipila ka katuigan. Dunay mga tawo nga nagmekaniko sa biseklita ug namaligya. Nakat-on sila sa bike maintenance mao nga naka income usab sila pinaagi sa pagpang-ayo sa mga biseklita. Ang hilig nahimong source of income. Maoy nakaayo.
Paspas
Karon nga hinayhinay kong balik og biseklita, mas nalingaw ko kay sa kaniadto. Sagad mag-inusara ra ko kay ang akoa pud nga agianan, naa man sa agianan sa mga sakyanan. Di man ko tig-trail. Makita nako ang palibot sa agianan, nindot nga talan-awon ug uban pa.
Niadtong usang Dominggo, gikuyogan ko ni Rembert Entice sa pagsikad. Dugay mi naabot sa Guba tungod kay nag-estorya ra man mi samtang nagtungas. Naahat pa kog pahuway kay nitubag og tawag sa amoang sakop sa newsroom.
Paghuman namog pamahaw, nanglahos pa mi sa Mabini diin sab namahuway ug nag-estorya. Kon ako rang usa niadto, nauli ko sa mga balay mga alas 10 sa buntag or earlier. Alas 11 sa udto na mi naabot.
Kana gung magsugod ka pa sa biseklita, labina first two years, sige kang gapaspas og tindak. Di gustong malabwan ang hambog. Apan magkadugay ka, mas malingaw na ka sa hinayhinay basta kanunay. Way hapit pahuwayay ug hunongay.
Food supplements
Kon mosikad ko, sagad moinom ko og food supplements, apan di daghan. Ang kuyaw man gud sa magpasagad ra tag inom, ari ni moigo sa atoang atay nga maoy mosala ug mo process sa tanan tang gikaon. Sagad, usa or duha lang ang akong imnon.
Lahi ra kon duna kay iabag sa imong lawas sa imong pag-ehersisyo. Apan sa ako nang giingon, mas maayong di palab-anan. Kana sang proven na sa ubang mga tawo ang iyang maayong epekto. Bisan unsa, basta igo-igo ra. Mao ni ang importante, magmatngon.