Mongaya: Mga awto gub-a na, Mr. President

NAA pa sa pantalan sa pagkakaron ang upat ka mga luhong sakyanan nga nasakpang gi-smuggle sa pantalan sa Sugbo sa miaging Disyembre 2018. Kanus-a kaha kini ipaguba ni Presidente Rodrigo Duterte?

Naandan na man gud nga aksyon sa presidente nga ipaguba gyud ang mga luhong sakyanan isip simbolo nga di gyud mosugot kining atong administrasyon karon og smuggling sama sa mga luhong sakyanan.

Mas maayo sab nga ipaguba dayon ni Presidente Duterte ang maong mga sakyanan aron mapapas ang mga huhungihong sa pantalan nga iyang mga tawo lang usab ang nagpaluyo niini.

Makaingon dayon kita nga di gyud diay uyon ang presidente ug, kon tinuod man nga nalambigit ang usa ka Filipino-Chinese vintage car collector ug ang amigo niini nga VIP, mapitol dayon sila.

Tayming, alang kanako, nga hisgutan kining maong isyu kay nia mismo ang presidente sa Sugbo ug manghinaot kita nga dunay reporter mangutana kaniya kabahin sa iyang aksyon sa maong mga sakyanan nga nahimong kontrobersya diha sa pantalan.

Magpasalamat sab kita sa abtik ug strikto nga si District Collector Elvira Cruz kay ubos sa iyang superbisyon nga nasakpan ang maong pagsuway og smuggle pinaagi sa misdeclaration. Abtik sab ang atong x-ray unit ug ang Customs Police nga ubos kang Capt. Gerry Arizabal.

Nalipay kita nga walay nalambigit nga local nga customs broker. Buot ipasabot, taga kaulohan ang nimaniobra sa maong palpak nga pagpalusot.

Atong nasayran nga sunod-sunod ang pag-anhi sa mga imbestigador gikan sa kaulohan. Maunsa man ang resulta sa ilang imbestigasyon, labing maayo nga naguba na kining mga awto.

Naa man guy daghang mga istorya nga pabugnawon lang ang maong kontrobersya ug sa ngadto-ngadto, hilom kining i-auction. Ayaw intawon sa pagsugot, Mr. President.

Rali

Nia karong adlawa sa Sugbo ang mga kandidato sa pagka senador nga suportado ni Presidente Duterte. Gani, gipaabot nga moanhi mismo sa Sugbo ang presidente aron motambong sa dakong rali sa PDP-Laban karong hapon.

Bisan pa man Charter Day sa Syudad sa Sugbo karong adlawa, giirog gyud ni Mayor Tomas Osmeña ang kalihokan nga pagpanghatag og bugas alang sa mga drayber sa habalhabal aron makalugar ang mga Sugboanon sa pag welcome sa presidente.

Bong ug Dong

Wala ko mahibulong nga nasulod sa Magic 12 ang sinaligan ni Presidente Duterte nga si kanhi SAP Bong Go. Gawas sa mga nagsalig og budget aron makalihok, daghan ang boluntaryong nagsuporta kaniya.

Mao nga malaumon sab ako nga mosaka ang popularidad ni Dong Mangungudatu, ang niguwa nga spokesman karon sa mga pamilya sa biktima nga nangayog hustisya tungod sa sa Maguindanao massacre.

(@anol_cebu sa Twitter)