GIPAHAMTANGAN na og silot ang tulo ka nurses sa Tuburan District Hospital gumikan sa kalapasan sa Patient’s Privacy Act. Kini human nila makuhai og video ang nagtinga nga pasyente nga gidala sa maong tambalan niadtong Pebrero 8. Kini gi-upload sa social media ug nag-viral. Patrabahuon pa sila kutob sa Hunyo sa pagkatapus sa ilang unom ka buwan nga kontrata kay job order employees ra sila.
Gisilutan sila gumikan sa ilang pagkuha og video sa himatyon nga pasyente nga si Gembe Casas, kinsa napusilan sa kapulisan sa Tuburan atol sa buy bust operation. Pero wala sila masiluti sa wala nila pagpakabana sa pagtabang kang Casas. Asa may bug-at nga ilang nahimo? Ang pagkuha sa video ug pag-upload sa social media o ang wala dayon pagtabang sa pasyente?
Kon buot usab natong huna-hunaon angay kitang magpasalamat sa nagkuha sa maong video. Tungod niadto nabisto ug napagya ang pagpabaya sa mga hospital personnel sa maong tambalanan. Kon wa pa kadto mapagya sa social media, nahibalo kaha si Dr. Rene Catan, hepe sa Provincial Health Office o ba kaha si Gov. Hilario Davide III nga nagpabaya ang pipila ka mga hospital personnel sa katungdanan.
Nganong ang maong mga nurses lamang ang gi-imbestigahan og gipahamtangan og silot? Nganong wa man gi-apil ang doctor on duty niadtong higayona sa dihang gidala si Casas?Limitado ang function sa usa nurse. Dili sila maka-basta-basta mohatag og tambal sa usa ka pasyente kon walay mando sa doktor.
Wala diay doktor niadtong higayona nga mi-assess sa kahimtang sa pasyente? Nag-wild kuno ang pasyente bunga siguro kay himatyon. Nangluwa ug namatid sa mga hospital personnel nga mi-atiman. Kon diha pay doktor nga nakamando sa mga nurse nga injectionan og pangpakalma ang maong pasyente, aw, mokalma to. Pero wa may certified doctor nga nag-dirihir.
Nagtinga man kaha, nganong wa man tauri og oxygen o dextrose? Daghan pang mga pangutana ang angay tubagon sa hospital chief sa Tuburan District Hospital ubos sa command responsibility. Unsa ang gihimo o angay himuon aron di na masubli Angay siguro nga kini maoy tagdon sa Davide administration, di ang pagtukod og 20 ka andana nga edipisyo. Negosyo man nang inyo, di serbisyo.
(bobbygnalzaro@gmail.com)