MADUGUON ang Biyernes sa Metro Cebu tungod sa kadaghan sa mga kinabuhi nga nangakalas. Napu ang patay sa managlahing mga hitabo. Usa ra ang komon- nakutlo ang mga kinabuhi tungod sa mga bala. Kadaghanan kanila gilambigit sa illegal drugs, gawas lang sa Barangay Lusaran kay giiingon sa kapulisan nga tungod kadto sa ilegal nga mga armas.
Gawas sa daghang mga kinabuhi nga nakalas, daghan ug dagko na ang kantidad sa illegal drugs nga nakuha. Naa nay mga kinilo. Naandan na ang tag tunga ngadto sa sobra sa usa ka kilo ang makuha.
Hayan gani, di pa matapos ning tuiga, posibleng moigo sa P1 billion ang masakmit sa kapulisan nga illegal drugs.
Makapahibung kaayo nga inay magkagamay ang illegal drugs nga nasakmit, nianam na hinuon kadaghan. Unya, bisan linghod pa kaayo og mga edad, nalambigit na. Sa ato pa, wa diay mangahadalok ning mga nalambigit sa illegal drugs kay nagdaghan na man hinuon ang nasakmit ug nagkabata ang mga nalambigit?
Ning sunodsunod nga mga ronda ug dakop, diin kinilo sa gituohang shabu ang nasakmit, nitumaw ang mga pagduda nga recycled kining illegal drugs. Mahimong planted ang nga ebidensya aron ipalutaw nga grabe gihapon ang suliran sa drugas.
Lahi kaniadto nga ipresentar sa kapulisan ug korte ang imbentaryo sa illegal drugs. Ila kining ipakita sa di pa gub-on.
Mao unta ni ang labing maayong buhaton sa kapulisan nga procedure sa ingon, mawagtang ang pagduda sa publiko nga kining tanan diay karon, drama lang. Di scripted ug gi-recycle lang sa kapulisan ang tanang drugas nga nasakmit.
Hinaut pa nga si Police Regional Director Debold Sinas, kinsang liderato aktibo kaayo batok sa illegal drugs, mopresentar sa mga sakop sa media, sa tanang nasakmit nga illegal drugs. Sa ingon mawagtang ang pagduda sa publiko nga kini recycled.