SECTIONS
Sunday, March 24, 2019
SUPERBALITA CEBU

Gi-salvage ang tanod?

Samdan: Si PO3 Pacheco Pulgo mipakita sa iyang samad pinusilan dihang namusil si Renato Goc-ong, tanod sa Barangay Lusaran nga ilang gironda. (tampo sa PRO 7)

MGA pulis nga ningronda sa balay sa usa ka barangay tanod sa Lusaran, bukirang dapit sa Dakbayan sa Sugbo, giakusahan sa pamilya nga nang-salvage.

Giingong diretso kining nangrakrak pagsulod sa balay nga unang gikamatyan sa asawa niini.

Bisan giingong nitahan na si Renato Goc-ong, giingong gikulata kini ug pagkahuman gipusil patay sa mga pulis.

Mao ni ang alegasyon sa usa sa mga anak sa magtiayong Renato ug Emma Goc-ong, kinsa nangamatay sa pag-serve sa search warrant nila ni Chief Inspector Chuck Barandog, hepe sa Cebu City Mobile Force Company niadtong Biyernes sa kaadlawon.

Apan si Barandog nanghimakak, niingon nga engkwentro ang nahitabo, nga gikaangol sa usa nila ka kauban nga si PO3 Pacheco Pulgo.

Ang anak lalake, kinsa nangangkon nga nakakita sa hitabo kay, nisulti sa Superbalita Cebu Facebook live, nga diha siya sa pikas kwarto natulog dihang nangabot ang mga pulis.

Pasado alas 2:20 sa kadlawon ning-abot ang mga pulis nga gibana-banang 20 ka buok.

“Wala ko kabalo na mga pulis to sila kay wala man sila nag uniform unya nag bonet sad,” matod sa anak nga lalake.

Paghuman og libot sa mga pulis sa ilang balay, nakamatngon ang iyang mga ginikanan.

Nigawas ang ilang inahan sa balay, kinsa gipangutana kon hain ang ilang amahan.

Wa motubag ang ilang inahan tungod sa kahadlok kay wa sila makahibawo nga mga pulis.

“Sige sila og syagit nga Renato, gawas, gawas!” kutlo sa anak sa singgit sa mga pulis.

Nibalik ang ilang inahan sud sa balay.

PINUSILAY

Kay wa mogawas si Renato, giingong gisikaran sa mga pulis ang pultahan og katulo dayon nagpaarak sa armas.

Dinhi naigo ang ilang inahan ug namatay samtang wa maunsa ang ilang amahan.

Gisulod sa mga pulis ang balay para pangitaon si Renato, apan nakamatikod ang ilang amahan hinungdan nga nibawos pagpusil.

“Mingbawos si Papa kay naigo man si Mama. Unya naa sab siyay armas kay tanod man siya. Human mingbawos og pabuto si Papa ug nanagan ang mga pulis sa gawas kay nahadlok unya mingsiyagit sila nga “surrender,surrender,” dugang sa anak.

“Surrender na kay kon dili, mabanig pamliya gayud ni, madamay pamilya nimo,” matod niya.

Matod sa anak, nitago siya ilawom sa katre hinungdan nga wa siya makit-i sa mga pulis.

Nakakita siya sa tanang mga hitabo pinaagi sa gamay nga buslot sa bungbong sa ilang balay.

Tungod sa kahadlok, nigawas si Renato aron mo-surrender ug gilabay ang iyang armas.

Matod niya nga gipusasan sa mga pulis ang iyang amahan.

Matod sa anak nga human mapusasi ang iyang amahan gidala kini sa hayag sa unahan sa ilang balay ug gikulata hinungdan nga nakaangkon og mga bun-og.

Nadunggan sa anak nga nisiyagit ang ilang amahan human sa giingong pagbun-og.

“Sa akong pagduda nga giplanteran si Papa, tungod ming sulti kini nga ayaw butangi akong bulsa. Unsa man nang inyoha? Planteran manko ninyo nga tanod man ko, wala man ko nagbuhat ani,” dugang sa anak.

Gitawag si Renato sa mga pulis aron patan-awon sa iyang asawa sulod sa balay, apan wa mosugot tungod sa kahadlok nga basin siya patyon.

Dugang sa anak nga sa pagdayon og tikang sa iyang amahan para tan-awon sa asawa, gipusil kini sa mga pulis sa makatulo ka higayon.

Nagkanayon ang anak nga gipusil kini sa iyang ulo, dughan ug sa laing parti sa lawas.

Sigon sa anak nga human sa pagpusil sa mga pulis diha na nila gitangtang ilang bonnet ug nipaila nga pulis.

“Kalit ra kaayo, Sir, bah kay kon tinarong pa to ilaha, mo surrender manto si Papa kay unsa may kahadlukan ato niya nga kon shabu lang, wala man jud to,” subay sa anak.

GUN-FOR-HIRE?

Gihimakak ni Barandog ang pasangil nga bisan ni surrender na si Renato, gipusil gihapon kini.

Matod niya nga di nila kinaiya ang pagpatay sa tawo nga motahan.

Nakasabot siya sa gibati sa anak sa magtiayon nga nawad-an og ginikanan apan kinahanglan nga modepensa usab ang pulis sa kaugalingon.

Iyang gipasabot nga sa ilang pag-abot sa balay sa mga Goc-ong, nipaila dayon sila nga pulis, apan si Emma nibalik sa pagsulod ug nanira.

Wa na kini mangabli pa hinungdan nga nakahukom sila nga ilang pugson pagsulod ang balay apan gipusil si Pulgo.

“Nakasabot kaayo mi sa feeling sa anak atong namatay. Kinsa man guy pulis nga gusto nga maingon ato nga naa mamatay? Wala gyud, oy. Mao to nag pinusilay nga wala nata kahibalo sa sulod nga naapil na diay ang asawa. Wala to mo surrender kay kon ni-surrender pa to siya, walang namatay sana,” matod ni Barandog.

Sila si Renato ug kaubang tanod nga si Reynaldo Laguna iyang gialegar nga mga gun-for-hire.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!