MAKAHATAG og kabalaka ang nahitabong sunod-sunod nga mga sunog dinhi sa siyudad sa Davao sukad niadtong Miyerkules ug Huwebes semanaha lang.
Ang sunog sa may Isla Verde, Boulevard, Barangay 23-C, dakbayan sa Davao milamoy og daghang mga balay ug nagdislokar og daghan natong mga kaigsuonang mga Badjao ug kasamtangan karong nanimuyo sa evacuation center sa kasikbit nga lugar.
Gisundan kini sa sunog sa may Purok 13, Kasilak, Brgy 76-A, Bucana nga miabo sab og mga balay.
Mga nahisgutang sunog nahitabo niadtong adlaw nga Miyerkules partikular sa hapon ug sa gabii.
Pagkasunod adlaw, Huwebes, laing sunog na sab ang niulbo sa Toyota St., Barangay Centro Agdao kon diin dunay usa ka kinabuhi ang nakalas.
Ang katalagman di matagna, moabot kini nga di nato damhon. Apan puwedeng makunhoran ang mahimong damyos ug pagkakalas og kinabuhi kon kita magmatngon og mag-amping sa panimalay, ilabi na gyud sa atong mga butang nga gigamitan og kuryente.
Hinuon ang uwahing duha ka mga sunog, wala pa masayri kon unsay hinungdan apan kasagaran nga tinubdan sa sunog mao man ang di saktong paggamit sa kuryente, ilabi na gyud sa sa mga aplayanses sa panimalay.
Di sab nato kakompiyansahan ang kainit sa adlaw kay gumikan sa naglagiting kainit, halos modagkot na kini og kalayo ilabi na gyud sa mga ugang sagbot o sa mga balay nga ginama lang sa kahoy.
Kanunay nang nagpahimangno ang buhatan sa Bureau of Fire Protection nga mag-amping kanunay batok sa sunog. Kay matud pa lagi, mas maayo pa ang makawatan, imbis nga masunogan.
Kay ang makawatan, duna pay mabilin nga mapuslang mga butang, apan ang maagian og sunog, wala gyuy bisan usa ang mahikap.