LAMBAYONG, Sultan Kudarat -- Patay ang usa ka kawani sa Department of Environment and Natural Resources (DENR) nga negusyante human gipusil alas 8 sa buntag niadtong Biyernes, Pebrero 22.
Giila ang biktima nga si Kandatu Ali Bansil, 52, molupyo sa Purok Namnama, Barangay Poblacion, Lambayong.
Sumala ni Police Colonel Reynaldo Felestino, Sultan Kudarat Police Provincial Office director, nga nagluto ang biktima sa gipanag-iyahan niya nga Nemfas Eatery, tapad sa iyang balay.
Apan kalit lang gisulod sa duha ka wala mailhing tawo ug gipusil tumong sa tangkugo ug likod sa lawas.
Abtik sab nga miikyas ang mga suspetsado sakay sa motorsiklo nga walay plaka paingon sa hilit nga dapit sa Lambayong.
Si Bansil gitabang sa iyang pamilya ug gidala ngadto sa Lambayong District Hospital apan gideklarang dead on arrival sa mga doktor.
Personal nga atraso ang gilantaw sa mga awtoridad nga motibo sa pagpatay sa biktima. (Edgar E. Fuerzas)