DIGOS CITY -- Giklaro sa mayor sa dakbayan nga wa siya manghilabot sa Kapa Ministry International, Inc., subay sa pasangil sa usa ka bokador nga magpapili sa eleksiyon.
Gibutyag ni Mayor Joseph Peñas nga way kamatuoran nga siya ang utok sa pagpa-imbestiga aron mahunong ang kalihukan sa Kapa (Kabus Padatoon).
Sumala ni Peñas nga wala siya manghilabot sa kalihukan sa grupo ug gihimo lamang ang pasangil aron dauton siya ngado sa mga botante sa Davao del Sur.
“Ang tinuod wala ko manghilabot anang Kapa. Gihimo lang na ni aning tawhana aron madaut ko sa mga miyembro sa KAPA. Ang kasuko sa akong kaatbang sa politika mao naghimo ana unya gigamit ning tawhana aron patuhoon mong mga miyembro,” asoy ni Peñas.
Nahitabo ang pangutana sa dihang misuroy si Peñas sa Barangay Malungon sa lungsod sa Magsaysay, Davao del Sur diin nangutana ang mga opisyal sa lugar.
Atol usab sa pag-abot ni Peñas sa Arnaldos Hotel sa dakbayan sa Digos, nasubli ang pangutana sa dihang nagtapok ang mga lider sa sa Hugpong ng Pagbabago (HNP) nga gikan sa lungsod sa Matanao.
Si Peñas midagan nga gobernador sa Davao del Sur atbang ni incumbent Governor Douglas Cagas.
Adlaw’ng Biyernes, mikatag sa social media ang gipakanaug nga “cease and desist order” ug rebokasyon sa rehistrasyon sa Kapa gikan sa Securities and Exchange Commission. (Orlando B. Dinoy)