ANTIPAS, North Cotabato -- Usa ang napatay samtang laing siyam ang naangol sa engkuwentro tali sa mga pulis ug armadong grupo ala 1:00 sa kaadlawon kagahapon, Pebrero 23.
Ang namatay mao sila si Arlene Denosapal, 49, samtang ang nasamdan mao sila Rolando Bayocboc, 42, Mercidita Bayocboc, 43, Forferio Poblico, 66, Edwin Denosapal, ug Cherry Mae Denosapal, mga molupyo sa Sitio Panipasan, Barangay Datu Agod, Antipas.
Samtang sa bahin sa mga pulis, naangol sab sila si Captain Jay Abarquez, Police Patrolman Ubert Colago, Master Sergeant Albert Tubang ug Staff Sergeant Antonio Osorio.
Gibutyag ni North Cotabato Police Provincial Official director, Police Colonel Maximo Layugan nga nagpatuman ang mga pulis og search warrant operation, uban ang puwersa sa North Cotabato Provincial Mobile Force Company, Intelligence Unit, Antipas Municipal Police Station ug 19th Infantry Battalion, Philippine Army batok kang Edwin Denosapal didto sa Sitio Panipasan, Barangay Datu Agod.
Apan pasulod pa lang sa raiding team sa maong dapit, gipabuthan na sila sa mga alipores ni Denosapal nga maoy hinungdan sa duha ka oras nga binakbakay.
Nahunong lang ang pinusilay human nga samaran ug nakorner na angmga suspek.
Narekober sa mga pulis sulod sa balay sa pamilyang Denosapal ang duha ka 12 gauge shotgun, usa ka kalibre .45 nga pistola ug mga bala.
Target sa search warrant si Edwin Denosapal nga giingon lider sa gun-for-hire sa North Cotabato ug Maguindanao Province.
Mga samaron gidala ngadto sa Antipas District Hospital.
Samtang hugtanon nga gipanghimak sa pamilyang Denosapal nga misukol sila sa raiding team gumikan wala silay armas ug mga edaran na ug kadaghanan mga babaye pa. (Edgar E. Fuerzas)