TULO ka pulis ang samaron samtang upat ka mga priso ang napatay atol sa natigayong Greyhound operation sa Davao City Jail pinaagi sa hiniusang puwersa sa Police Regional Office (PRO), Bureau of Jail Management and Penology (BJMP), Davao City Police Office (DCPO), Criminal Investigation and Detection Group (CIDG), ug Philippine Drug Enforcement Agency (PDEA) Sabado sa kaadlawon, Pebrero 23.
Sa gihimong Oplan Galugad, miresulta sa pagkasakmit sa mga nagkadaiyang matang sa drug paraphernalia ug mga ilegal nga kontrabando ingon man ang duha ka pakite sa gituohang shabu nga mokantidad sa P160 mil.
Sayo sa buntag gihimo dayon ang usa ka random drug testing sa mga priso ug miresulta sa pagpositibo sa paggamit og ilegal nga druga ang siyam ka mga inmates ug si BJMP Jail Chief Inspector Roman Hernandez, provincial jail administrator sa BJMP Davao del Sur.
Natigayon ang kasamok diin atol sa pag-ukay sa otoridad sa mga gamit sa mga priso, mibunlot og sumpak ang usa ka piniriso diin gipamusil ang mga pulis.
Dugang nasayran sa SuperBalita nga giingong atol sa kasamok, pipila ka mga piniriso mikarambola sa mga pulis nga miukay sa ilang mga gamit.
Sa impormasyon ni DCPO spokesperson Senior Inspector Ma. Theresita Plaza-Gaspan, ang mga nasamdan nga mga pulis mao sila Police Officer (PO) 2 Jonie dela Fuente nga dunay dinunggaban sa tiyan ug napusilan sa dughan; PO1 Vincent Lomoljo, dunay samad hiniwaan sa lawas, ug PO1 Ramon Rey Uyanguren dunay samad pinusilan sa iyang kalawasan.
Nadestino sa Sta. Ana Police Station ang nasampit nga mga pulis samtang ang usa ka PO3 Mark Anthony Cameros, ang vest lamang ang naigo niini, suma ni PSI Gaspan.
Ang napatay nga mga priso gipang-ila sa DCPO nga sila Alvin Celis, Dexter Delfino, Flor Leonard Restauro, ug Jerry Fernandez diin nakuha sa posisyon ni Celis ang usa ka homemade firearm (sumpak), ug tulo ka mga kutsilyo ang narekober sa mga napatay nga priso.
Si BJMP Jail Chief Inspector Roman Hernandez ang gilayong gidala sa buhatan sa PDEA-Davao aron didto kini luwas nga makustodiya.
Sumala ni Gaspan nga gikan sa main building ang siyam ka inmates nga nagpositibo sa drug testing diin ang upat gikan sa cell 18 sa Annex building.
Ang upat ka mga priso nadala pa sa Southern Philippines Medical Center apan gideklara kining dead on arrival.