MGA security guard ug ilang security agency ang gipahinumduman karon sa Police Regional Office (PRO)-7, nga dili sila exempted sa balaud ug angay lang nga siguruon nga lisensyado ang armas ug nakakuha og Comelec gun ban exemption.
Kini human nasuta ni PRO-7 director, General Debold Sinas nga adunay mga security guard sa nagkadaiyang establisyemento dinhi lang sa Sugbo, diin way gun ban exemption ug dili lisensyado ug mga paltik pa gyud.
Nasuta kini atol sa gihimo nga pagsusi sa Firearms Unit sa rehiyon, niadtong Byernes, Pebrero 22, isip apil sa ilang gihimo nga pagpangandam sa seguridad alang sa pagduaw ni Presidente Rodrigo Duterte sa Sugbo, Domingo, Pebrero 24.
Gitug-an ni Sinas nga niadto lang Byernes, aduna silay upat ka mga security guard sa nagkadaiyang establisyemento sa dakbayan sa Sugbo ang gisikop human nga nasakpan nga ang gidala-dala nga armas, paltik.
Hinungdan nga mag-atubang sila og kaso nga paghupot og dili lisensyado nga armas ug kalapasan sa Comelec gun ban.
Matud ni Sinas nga ang warning dili lang alang sa mga brangay o bisan kinsa nga government official, kun dili alang sa tanan nga adunay mga armas.
“Mao bitaw istorya namu karon, informing everybody, kon naa mo mga armas nga expired na, sa pag-surrender na. So this will serve a warning, ako ni gipa-implement sa region 7."
"The point is you should follow the policy, kay kadugay na namu ni gi-remind, gi-estoryaan, tapos kon mag-implement na arya pa ta mag-react,” gipahibaw ni Sinas.
Dugang sa director nga ang mga security agency sa maong mga guard nga nasikop ang mag-atubang usab og administrative case gikan sa PRO-7.
Gani gitug-an usab ni Sinas nga adunay usa ka pribado nga tambalanan sa Sugbo, ang adunay gwardiya ang wala’y armas, human nga gidis-armahan na sila sa ilang agency, pagkahibalo sa nadangatan sa uban nga security guard.
Bahad ni Sinas sa mga guwardiya ug sa mga security agency nga magpadayon na ang ilang himuon nga inspection.
“So sa mga security agency, sa ilang mga guard, dapat pusil nimu dili paltik, ikaduha dapat license, ikatulo naay gun exemption, so karon namatikdan na sa mga operator, murag kadaghanan sa ilaha mga violators, ilahang mga guard wala nay pusil,” dugang ni Sinas.
Awhag usab ni Sinas sa mga nanag-iya og establisyemento nga sa pag-hire nila og security guard, siguruon na nila daan nga dili paltik, lisensyado ug nga adunay Comelec gun ban exemption ning panahon sa piniliay.