KUNG hisgutan ang gigikanan sa pamilya Aquino, gilayong mosulod sa hunahuna ang Lungsod sa Tarlac.
Si kanhi Senador Benigno “Ninoy” Aquino Jr. ang nahimong mayor sa Conception, Tarlac, ug napili kini isip bise gobernador ug nahimong gobernador sa lalawigan una nahimong senador. Si kanhi Presidente Benigno Simeon “Noynoy” Aquino III ang nahimong migunit sa ikaduhang distrito sa Tarlac.
Si Senador Bam Aquino naggikan sab sa Conception, apan daghan ang wala masayod nga dunay dugo nga Dabawenyo ang magbabalaud.
Sa istorya sa inahan ni Sen. Bam, nga si Melanie, duha ka tuig pa kini nga mianhi sa Davao City aron bisitahon ang iyang pamilya, ang iyang tiya nga si Leonor, nga ang na bana mao ang unang gobernador sa Davao nga si Ricardo Miranda.
Samtang naa sila sa Davao, mipuyo sila sa iyang tiya nga si Leonor, hangtud nga nahukman nila nga diri na sila mopuyo gumikan ilang nagustohan ang lugar.
Nagtrabaho ang mga ginikanan ni Melanie nga sila Segundo Aguirre ug Victoria Francisco sa City High School nga karon mao ang Davao City National High School (DCNHS) sa Torres Street.
Human niadto, nakauban ni Melanie ang iyang amahan nga anaa nagtrabaho sa Mindanao Colleges, nga karon mao ang iladong University of Mindanao (UM) sa Bolton Street, Davao City.
Nagtrabaho ang iyang amahan isip principal sud sa 40 ka mga katuigan, samtang ang iyang inahan nagtudlo og Filipino sa maong tunghaan.
Nag-eskuwela sa elementarya si Melanie sa Santa Ana Elementary School nga anaa sa Uyanguren Street, (Magsaysay Avenue) Davao City kinsa nahuman isip valedictorian niadtong 1956.
Nabutyag ni Melanie nga suma sa iyang igsuon, dako ang posibilidad nga ka-schoolmate sila ni Pangulong Rodrigo Duterte nga mihuman sab sa elementary sa nasampit nga tunghaan niadtong 1956.
Apan subay sa panuki-duki, wa na kini makomperma sanglit nasunog ang tunghaan pipila ka dekada na ang milabay ug naapil ang daghang mga rekord sa mga estudyante.
Sa Davao sab mihuman si Melanie sa iyang hayskol, ngari sa Philippine Women’s College (PWC) sa Juna Subdivision, Matina, ug sa kolehiyo sa University of Mindanao UM-Bolton diin niya nahuman ang kursong accounting nga dunay pasigarbo nga magna cum laude niadtong 1964.
Dihang nakapasar kini sa board exam, anaa siya sa 19th placer niadtong 1965, mibalik si Melanie sa Davao aron magtrabaho sa Sycip, Gorres and Velayo (SGV).
Sa SGV niya nailhan ang bana nga si Paul, nga niadto nalakip sa management services division sa kompanya, ug didto na nagsugod ang ilang matahom nga istorya sa gugma.
Tuig 1968, gikasal sila Paul ug Melanie sa Santa Ana Church sa Davao City. Nagrasyahan og tulo ka mga anak nga sila Paul Dennis, Paul Victor ug si Paolo Benigno.
Si Paolo Benigno, gihatagan og angga nga "Bam" gikan sa cartoon character nga Bam-Bam and Pebbles.
Maingon nga di lamang Taga Tarlac si Senator Bam, kundi naa sab siya'y kasingkasing nga Dabawenyo, gumikan sa inahan, kinsa gihatag ang panahon sud sa 21 ka mga katuigan sa Davao City gikan sa iyang pagkabata hangtud nga kini gikasal.
Sa maong hitabo, tuig 2013 si Senator Bam Aquino nahimong "adopted" sa napulo ka tribo sa Davao City isip Datu Matulangod.
Ang napulo ka tribo nagtapok aron hatagan og seremonya si Bam Aquino nga dakong kabahin sa mga tribo sa dakbayan subay sa kagikan sa iyang ginikanan pipila ka dekada na ang milabay.