DIGOS CITY -- Gideklarang dead on arrival sa balay tambalanan ang usa ka panday human nakuryentehan, Sabado sa gabii, Pebrero 23.
Si Superintendent Deozar Almasa, city police director, nag-ila sa biktima nga si Alexander Monsad Artiaga, 38-anyos, adunay kapuyo ug nagpuyo sa Purok Sadipa, Roxas Extension, Barangay Zone 2.
Sa inisyal nga imbestigasyon sa kapulisan, nasayran nga banda alas 6:30 sa gabii samtang ang biktima nag-operate sa electric sander didto sa roof top sa gitrabahong balay ni alyas Totong Lagare sa Purok Rosas, Barangay Tiguman, Digos City, kalit nga nakuryentehan.
Si Almasa nagbutyag nga mikirig ang biktima ug nahagbong sa yuta.
Daling gitabang ang biktima padung sa Davao del Sur Provincial Hospital alang sa medikasyon apan ang mga nag-atimang doktor nagdeklara kaniya nga wa na'y kinabuhi.