ANG Overseas Workers Welfare Administration Regional Welfare Office (Owwa)-Davao Region naggunit ning kasamtangan og mokabat 1,419 ka mga welfare cases sa mga Overseas Filipino workers (OFWs) sa miaging tuig 2018.
Subay sa datus, sa maong ihap dunay 42 ka mga kaso nga na-file sa mga kabanay sa OFW.
Gilangkuban kini sa physical illness, diin naay pito ka mga kaso nga dunay mental illness, 120 cases niini gimaltrato, 36 ang sa physically ug verbally abused, 50 cases alegasyong gilugos or sexual harassment.
Naa sa'y 136 ka mga kaso sa OFW diha sa wa sila mabayran sa ilang suweldo ug sa pagkalangan sa paghatag kanila niini; 27 ka dependents kinsa nangutana kun asa na nagpuyo ang ilang mga kabanay nga naa sa abroad; 63 mi-request og assistance gumikan wala na nila makontak ang ilang mga kabanay nga nanarbaho sa gawas.
Naa sab 37 nga nangutana sa status ug kondisyon sa ilang mga kabanay; 71 complaints sa OFWs nga naa sa sobra ra kaayo ang trabaho; 15 nangayo og panabang alang sa medical assistance ug 37 families nag-request og assistance alang sa ilang mga kabanay nga nagtrabaho abroad nga napriso.
“The above-mentioned requests for assistance were well-taken by this office and were properly endorsed to the Philippine Overseas Labor Office (POLO) to look into the cases,” pahayag sa OWWA-11.
Alang sa dugang impormasyon sa mga kabanay sa abroad, mamahimo nga moadto sa buhatan sa OWWA-Davao region sa Doors 31 E-G, G.B. Cam Building, Monteverde St., Davao City ug puwede sila matawagan sa call hotline numbers 0917-701-1135 o 0917-701-1126.