DILI matukib ang kalipay sa mga pasyente ug mga ginikanan sa mga bungi nga gipakatawo gikan sa Sugbo ug mga silangan isla sa Kabisay-an lakip sa pipila ka bahin sa Mindanao.
Ang ika-37 nga misyon sa Operation Smile International Surgical Mission sa Sugbo gipahihgayon niadtong Pebrero 18 ngadto sa 23 sa operating room sa Visayas Community Medical Center (VCMC) sa Osmeña Blvd., dakbayan sa Sugbo.
Ang malampusong misyon giabagan sa MSY Charitable Foundation Inc., Visayas Community Medical Center, mga boluntaryong doktor ug mga indibiduwal o kabataan sa Sugbo.
Nasayran nga niabot og kapin sa 200 ka mga pasyente ang nangpa-screening niadtong Pebrero 16, apan 131 lang ang nakapasar sa higpit nga pagpili sa mga pasyente.
Si Dr. James Joaquino, Chief Medical Officer sa Operation Smile Philippines, niingon nga estrikto ang pagpili sa ipaubos sa operasyon aron malampuson.
Cebuano nga pilantropo nga si Mariquita Salimbangon-Yeung, Chairperson sa MSY Foundation, Inc., niingon nga lahi ang ilang ulahing misyon tungod sa paghimo sa press conference sa pagtampos sa operasyon.
Niadtong una, ang presscon ipahigayon sa layo pa ang adlaw sa misyon aron pagpakaylap sa kasayoran ug pagkuha og mga pasyente. Ang ulahing misyon, ang MSY ug Operation Smile volunteers nangonay sa pagpangkita og pasyente.
Gipasabot ni Yeung nga gituyo niya nga ang presscon gipahigayn sa niadtong Biyernes, Pebrero 22, sa Shalom Hotel sa VCMC compound aron matunong sa presensiya sa co-founder ug CEO sa Operation Smile nga si Dr. William P. Magee, Jr.
Gibutyag ni Yeung nga lima ka tuig ang ilang memorandum of agreement (MOA) tali sa Operation Smile apan dunay na kini natapos ug nagpadayon gihapon ang ilang panag-uban.
“Basta daghan pa ang nanginahanglang kabus, dili kita mohunong sa pag-alagad...” matod ni Yeung.
Samtang, si Dr Magee nagkanayon nga dakong hagit sa misyon ang pagpataas sa level sa operation gikan sa instrumentation, abilidad sa team sa mga doktor ug after-care o rehabilitation.
“It is not easy to do all these in a global perspective especially the sustainability of the program..,” matod ni Magee toguwang na siya ug iyang asawa apan nalipay sa saad sa ilang mga anak sa pagpangulo sa pagpadayon sa kawsa.
Mapasigarbuhon nga gipahibalo ni Dr. Magee nga ang Operation Smile magsugod o nahinugso sa ilang unang pagbiyahe sa Pilipinas uban sa iyang asawa niadtong 1997 ug nipalad na kini karon nga misyon ngadto sa ubang bahin sa kalibotan. (RRM)