NAG-UNA sila si Ronald Malacora sa Department of General Services ug Atty. Evangeline Abatayo sa Office of Cebu City Registrar isip outstanding department heads.
Napili usab nga outstanding assistant department head si Giovanni Delgado sa City Accounting Office samtang si Engr. Alberto Bontuyan sa DGS ang gideklarar nga mananaog.
Ang OCCR ni Abatayo mao sab ang napili nga outstanding department (small) ug ang DGS (big) maoy labing maayo nga moserbisyo.
“Nagpasalamat kog dako nga na-recognized ang effort sa office at the same time nakita nila ang pagpaninguha para sa kalambuan serbisyo nga atong gihatag,” padayag ni Malacora.
Si Dr. Jessica Maribojoc maoy outstanding division chief sa Department of Veterinary Medicine and Fisheries (DVMF).
Napili nga outstanding employee silang Dominador Penoliar III sa Budget Office, Migrenio Amores sa City Accounting, Casandra Dilao sa DVMF, Marilfa Berdin sa City Planning, Romeo Dela Cerna ug Jose Cosido sa DPS.
Ang mga mananaog nakadawat og plaque ug cash gikan sa City Hall.
TOPNOTCHERS
Gihatagan og pasidungog sa Cebu City Government ang 26 ka topnotchers sa board examination niadtong tuig 2018 kinsa magtungha sa lainlaing unibersidad sa dakbayan.
Ang 26 ka mga bag-ong graduate kinsa nasulod sa top 10 sa lainling board examination gipangulohan ni Megan Ashley Bartido kinsa 1st placer sa Respiratory Therapist ug Joseph Vincent Satura, 1st placer sa Naval Architect and Marine Engineers.
Sila giubanan sa ilang mga ginikanan pagkuha sa plaque.
Nagtapos sa kalihukan sa 82nd Charter Day ang testimonial dinner ug paghatag og pasidungog sa mga institution nga nagbase sa siyudad sa White Gold Club kagabii. (PAC)