GUMIKAN kay giingong malangay og abot ang ilang suweldo, usa ka 36 anyos nga maestro sa publikong tunghaan sa dakbayan sa Sugbo ang namaligya og gidili nga drugas.
Si Neler Tagpuno, 36, maestro sa San Nicolas Elementary School, siyudad sa Sugbo, gisikop sa kapulisan human masakpi nga giingong namaligya og gidili nga drugas sud sa usa ka subdivision sa Barangay Lipata, lungsod sa Minglanilla, niadtong Biyernes, Pebrero 22.
Matod ni Chief Insp. Verniño Noserale, hepe sa kapulisan sa lungsod sa Minglanilla, nga bag-o lang nakapasar sa accreditation exam si Tagpuno aron mahimo nga principal.
Si Tagpuno nadakpan sa anti-drug enforcement operatives sa Minglanilla Police Station atol sa synchronized “One Time, Big Time” operations sugod niadtong Biyernes.
Ang maestro nasikop sud sa iyang panimalay sa Villa Selina Subdivision sa Barangay Lipata, Minglanilla.
Nakuha gikan kang Tagpuno ang duha ka gagmay nga mga putos sa gidudahang shabu nga dunay gibanabanang balor nga P15,096.
Gihimo ang operasyon batok sa maestro human sila makadawat og tips gikan sa ilang mga impormante labot sa operasyon niini sa ilang lugar.
Human sa duha ka buwan nga surveillance, si Noserale ug iyang mga sakop ang nihimo og operasyon batok kang Tagpuno.
Si Noserale nibutyag nga si Tagpuno, naghupot og ranggo nga master teacher, gikonsiderar nga bag-ong player sa illegal drug trade sa ilang lungsod.
Ang hepe nitug-an nga base sa ilang interogasyon, si Tagpuno niangkon nga nakaestablisar na kini og daghang illegal drug contacts samtang nagserbisyo isip maestro sa publikong tunghaan sa Barangay San Nicolas.
“Naka-establish na siya og maayo. Lain-lain nana iyang sources sa shabu. Sauna adto siya mopalit og shabu sa Guadalupe, dayon sa Pasil ug sa A. Lopez Street (Barangay Calamba),” tug-an ni Noserale. Dihang nahinabi sa SunStar Cebu.
Matod ni Noserale, si Tagpuno niingon nga maong namaligya kini og gidili nga drugas tungod kay malangay og abot ang iyang sweldo nga P41,000.
Si Tagpuno nitug-an sa kapulisan nga nagsugod siya isip tiggamitan sa illegal drugs sa dihang nagtungha pa lang kini sa high school ug nagsugod og pamaligya og gidili nga drugas sa dihang nagtudlo na kini sa Grade 5 sa tunghaan sa siyudad sa Sugbo.
Si Noserale nidugang nga wa masayod ang anak ug asawa ni Tagpuno, kinsa usa ka Overseas Filipino Worker, nga namaligya kini og gidili nga drugas.
Si Tagpuno mag-atubang og kasong kalapasan sa paghupot ug pagpamaligya og gidili nga drugas. (B)