SA nakalabay nga mga adlaw nadasig ko nga nagsud-ong sa usa ka talagsaon nga hulagway nga gi-post sa facebook.
Ang mga karaan ug bag-o nga reporter nga nadistino sa police ug military beat nagkatapok. Di hinuon kumpleto apan nindot hunahunaon nga ang maong okasyon magpahinumdum sa mga panahon nga ang pipila kanila nahimong kabahin sa daghang panghitabo nga may labot sa ang kalinaw ug kahusay sa atong dapit.
Mga kauban nako sila mabag-o man o karaan niadtong aktibo pa ta sa maong gimbuhaton. Kauban sa maong hulagway may pipila ka komentaryo nga naghisgut sa daghang kinabuhi nga nakalas. Sama sa kampanya sa gobyerno batok sa iligal nga drugas.
Dunay niingon nga grabeha na daw sa coverage sa mga bag-ong reporter kay pewerting patay nga ilang gi-follow up.
Sama nga kini gitandi sa nanglabayng katuigan.
Mao sab na ang akong komentaryo kaniadto sa dihang nisuway ko og panimpad nga manginabuhi isip usa ka reporter sa radyo. Nahitabo ni sa tungatunga nga bahin sa dekada otsenta mga upat ka tuig human ko ni-graduate sa college. Isip usa ka linghod nga reporter maoy giingon nga nasubhan o nabunyagan ko sa usa ka makapanlimbawit nga coverage kay gipakuyog ko da mga tang-an nga reporter nga mag-cover sa kasikas sa Camp Sergio Osmeña Sr. Ang coverage may labot sa kasikas ug kaguliyang didto sa Edsa nga mao ang People Power Revolution.
Nakapangutana ko kong unsa nga matang sa propesyon kining akong gisudlan. Tungod kay mao pay pag-apil nako sa maong matang sa trabaho pipila pa lang ka semana human nga ako nakaduso sa akong application letter og nadawat, wa ko kasabot sa akong gibati.
Mopadayon o mangita nalang og laing trabaho. Sama sa nahitabo sa ubang reporter, inay mo-atras akong giisip nga usa ka dakong hagit ang kinabuhi sa media og ang nisunod nga panghitabo human sa Edsa mas nakapalig-on og maayo sa akong pagtoo nga ning maong matang sa propesyon daghan ta og matabangang kaigsoonan.
Nahinumdum siguro ang uban ninyo sa problema sa insurgency nga nigrabe human sa Edsa wa pay labot sa gubat sa Mindanao.
Ang strike sa pamuo nga bisan asa ka moadto naputos sa plakard ang palibot. Bisan diha sa dalan Colon daghang establismento nanira kay gihugpaan sa mga striker. Maayo ra ba unta kong di mosampot sa lamok lamok sama niadtong ataki sa mga polis ug bombero sa usa ka dakong tindahan sa Fuente Osmeña. Daghan ang nagkadugo. Sa Mandaue City mas grabe ang sitwasyon kay buto buto sa armas ang nilanog sa picket line.
Ang killing field sa Talisay ug Mandaue diin daghang kinabuhi ang nagbuy-od. Ang patay nga naglambigit sa Sparrow unit ug kapulisan nibanaw sab ang dugo. Kong gubat ang hisgutan tali sa NPA og kasundalohan way puas ang sinukliay sa bala diha sa may Sapangdako tadlaw sa kabuliran sa Baksan ug Napo. Sa natad sa kriminalidad ang operasyon sa Constabulary, pulis og mga sundalo batok sa Alega gang diha sa Labangon area nga gigamitan og helicopter di matabang.
Kadaghan sa coverage nga akong naapilan hangtod nga naapil sa akong assignment kadtong makasaysayanon nga ceasefire agreement diin ang National Democratic Front nag-opisina sa Capitol Compound.
Human mapusgay ang Ceasefire coverage na sab sa gubat og way puas nga alarma sa patay.